လါယူၤ(၂၇),၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဒူသထူၣ်ကီၫ်ရ့ၣ်, ကၠဲးထိၣ်ကီၫ်ဆၣ်အပူၤ သုးကီၣ်ကးအသုးခးလီၤကျိဖးဒိၣ်တဖၣ်အဃိ လီၫ်က၀ီၤကမျၢၫ်ဒီးသီခါ သံ,ဘၣ်ဒိတဖၣ်အိၣ်ထီၣ်၀ဲ၀ံၤ ပှၤ(၁)ကလးဃၣ်ဃၣ်ဘၣ်ဃ့ၫ်ပူၤဖျဲးသးအဂ့ၫ် ခ့ၣ်အဲၣ်ယူၣ်-ဒူသထူၣ်ကီၫ်ရ့ၣ်ပာ်ဖျါဃၣ်တဂီၤအံၤန့ၣ်လီၤ.
ဖဲလါယူၤ(၂၁)သီအနံၤန့ၣ် သုးကီၣ်ကးအသုး(အမတ-၃၀၁)လၢအိၣ်ဆီလၢၤအသးဖဲ ၀့ၫ်လၢၫ်ကတံာ်အံၤ ခးလီၤကျိဖးဒိၣ်တဖၣ်ဆူ ကၠဲးထိၣ်ကီၫ်ဆၣ်ပူၤအဃိ လဲၤလီၤတဲာ်၀ဲဒၣ်ဖဲတီၣ်ကၠီသီခါဖၠၣ်ကရၢၫ်ပူၤ၀ံၤ သီခါဖးဒိၣ်(၁)ဂၤပာ်ဃုာ်သီခါ(၁)ဂၤဘၣ်ဒိ၀ဲအသိး ကမျၢၫ်(၁)ဂၤစ့ၫ်ကီးဘၣ်ဒိ၀ဲအဂ့ၫ် ပာ်ဖျါဃၣ်၀ဲန့ၣ်လီၤ.
တကတီၫ်ဃီ ကျိဖးဒိၣ်(၁)ဖျၢၣ်လဲၤလီၤတဲာ်၀ဲဒၣ် ဖဲကၠဲးထိၣ်ကီၫ်ဆၣ်, မိးခမီးသ၀ီ, အီၣ်န၀့သီခါဖၠၣ်အကပၤအဃိ ကိၣ်အ့လွ့ၣ်ဟံၣ်အဖီခိၣ်အဃိ ဟံၣ်ဟးဂီၤကွံာ်၀ဲဒၣ်န့ၣ်လီၤ.
လါယူၤ(၁၄)သီအနံၤစ့ၫ်ကီး သုးကီၣ်ကးအသုး(အမတ-၃၁၀)ခးလီၤကျိဖးဒိၣ်(၂)ဖျၢၣ်အဃိ လဲၤလီၤတဲာ်၀ဲဒၣ်ဖဲ ကၠီးဟးကွ့သ၀ီအိၣ် အူစ့မ့အီၣ်ကရၢၫ်ပူၤအဃိ အဖိမုၣ်လၢအမ့ၫ် မးနၢၤဒၣ်လ့,သးနံၣ်(၁၄)နံၣ် မဲာ်ချံအထွဲတပၤဖျိးထီၣ်ကွံာ်သံ၀ဲတဘျီဃီ၀ံၤ အပုၫ်ဒ့မုၣ်လၢအမ့ၫ် မရွ့ၣ်စ့ၣ်လ့,သးနံၣ်(၁)နံၣ်(၅)လါအိၣ်စ့ၫ်ကီး နၫ်သက့ၤထံးအထွဲဒီးခိၣ်တိသၣ်၀ံၤနၫ်အထွဲတပၤစ့ၫ်ကီး သွံၣ်ဟးထီၣ်ဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ် လါယူၤ(၂)သီအနံၤဒီး(၁၂)သီအနံၤစ့ၫ်ကီး သုးကီၣ်ကးအသုးတဖၣ် ခးလီၤကျိဖးဒိၣ်တဖၣ်ဆူ ကၠဲးထိၣ်ကီၫ်ဆၣ်ပူၤအဃိ လီၫ်က၀ီၤကမျၢၫ်အဟံၣ်(၂)ဖျၢၣ်ဟးဂီၤကွံာ်၀ဲ၀ံၤ (၁၄)သီအနံၤစ့ၫ်ကီး ခးလီၤ၀ဲ ကျိဖးဒိၣ်(၁၅)ဖျၢၣ်ဃၣ်ဃၣ်အဂ့ၫ် ခ့ၣ်အဲၣ်ယူၣ်-ဒူသထူၣ်ကီၫ်ရ့ၣ်ပာ်ဖျါဃၣ်၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤသုးကီၣ်ကးအသုးအံၤ ကိးမုၫ်နံၤဃၣ်ဃၣ် ပညိၣ်ခးလီၤကျိဖးဒိၣ်တဖၣ်ဆူ ကမျၢၫ်အိၣ်ဒူသ၀ီပူၤအဃိ လီၫ်က၀ီၤကမျၢၫ်တဖၣ် ဘၣ်ပာ်တ့ၣ်ဟံၣ်ဃီဘၣ်ဃ့ၫ်ပူၤဖျဲးသး၀ံၤ ကၠဲးထိၣ်ကီၫ်ဆၣ်ပူၤ ပှၤဃ့ၫ်သုးပှၤလီၫ်အိၣ်ကမှံအိၣ်ထီၣ်(၁)ကလးဘျဲၣ်လံအဂ့ၫ် ခ့ၣ်အဲၣ်ယူၣ်-ကၠဲးထိၣ်ကီၫ်ဆၣ် တၫ်ကစီၣ်ပှၤဘၣ်မူဘၣ်ဒါ စံး၀ဲန့ၣ်လီၤ.
