လါယူၤ(၁၀)သီ, ၂၀၂၄နံၣ်
နီၣ်ဂံၫ်(၈) ကီၫ်စၢဖှိၣ်ကျဲမုၫ်, ယ့-ဒ၀ဲၫ်ကျဲမုၫ်အဖီခိၣ်(ရေး-ထားဝယ်လမ်းပိုင်း) တၫ်ဂ့ၫ်အကါဒိၣ်မ့ၫ်တအိၣ်ဘၣ်န့ၣ် တၫ်သုတလ့ၤလိၤဟးထီၣ်ဘၣ်တဂ့ၤအဂီၫ် တီနီၫ်သုးကျိၤ(ဒေါနစစ်ကြောင်း) ဟ့ၣ်ပလီၫ်ဘိးဘၣ်ရၤလီၤဃာ်၀ဲဖဲ လါယူၤ(၉)သီအနံၤန့ၣ်လီၤ. တၫ်မ့ၫ်တဒုးသ့ၣ်ညါက့ၤ တၫ်ဟ့ၣ်ပလီၫ်ဒံးဘၣ်န့ၣ် တၫ်သုတလ့ၤလိၤဟးထီၣ်ဘၣ်တဂ့ၤအဂီၫ် ဃ့သကွံာ်ကညးဃၣ်၀ဲန့ၣ်လီၤ.
သုးကီၣ်ကးသုးကျိၤတဖၣ် မ့ၫ်ဟဲထီၣ်သုးကျိၤန့ၣ် ဟဲထီၣ်၀ဲဒ်ကမျၢၫ်အက့ၫ်အဂီၤအသိးအဃိ တၫ်မၤဒုးယၤရဲၣ်ကျဲၤတဖၣ်အပူၤ တၫ်သုတဘၣ်ဒိဘၣ်ထံးလီၫ်က၀ီၤကမျၢၫ်တဖၣ်အဂီၫ် တၫ်ဟ့ၣ်ပလီၫ်ဆိပာ်အဂ့ၫ် တီနီၫ်သုးကျိၤ စံး၀ဲန့ၣ်လီၤ.
ကျဲမုၫ်ဒီတဘိအဖီခိၣ် တၫ်ပၢၫ်ဆၢသုးပာ်ဖှိၣ်တဖၣ် ဆီလီၤပာ်၀ဲအသုးရ့ၣ်တဖၣ်၀ံၤ ကမၤ၀ဲဒုးယၤရဲၣ်ကျဲၤတဖၣ်အဃိ တၫ်ဒုးတဖၣ်ကဲထီၣ်သ့ကိးဆၢကတီၫ်ဒဲးလီၤအဂ့ၫ် တီနီၫ်သုးကျိၤပာ်ဖျါဃာ်၀ဲဖဲ အလံာ်ဘိးဘၣ်ရၤလီၤအပူၤန့ၣ်လီၤ.
လါယူၤ(၇)သီအနံၤစ့ၫ်ကီး သုးကီၣ်ကး မီရ၀တံၣ်ထံသုး(မောရဝတီရေတပ်) ခးလီၤကျိဖးဒိၣ်၀ံၤအလီၫ်ခံ တၫ်ဒုးကဲထီၣ်သးဒီးတၫ်ပၢၫ်ဆၢသုးပာ်ဖှိၣ်တဖၣ်န့ၣ်လီၤ. သုးကီၣ်ကး ခးလီၤကျိဖးဒိၣ်အဃိ ဖိသၣ်ဆံးပာ်ဃုာ် ဟံၣ်ဖိဃီဖိတစှၤန့ၣ်(၃)ဂၤ ဘၣ်ဒိ၀ဲန့ၣ်လီၤ.
တလၢၤဒီး တနီသရံးတၫ်ပၢၫ်ဆၢဂံၫ်ဘါကရူၫ်တဖၣ်အံၤ စးထီၣ်လၢလါမးၡးန့ၣ် ပၢဃၣ်၀ဲ ယ့-ဒ၀ဲၫ်ကျဲမုၫ်အဃိ သုးကီၣ်ကးတပၤ ဒ်သိးကန့ၫ်ပၢဘၣ်က့ၤအဂီၫ် စးထီၣ်လၢလါယူၤ(၃)သီအနံၤန့ၣ် ဟဲထီၣ်သုးကျိၤဆူ မလွဲကစၢၫ်န့ၣ်လီၤ.
တၫ်ဟ့ၣ်ပလီၫ်အံၤအဖီခိၣ် ကမျၢၫ်တဖၣ်ကလူၤပိာ်မၤထွဲ၀ဲအဂီၫ်ဒီး တၫ်မ့ၫ်တလူၤပိာ်မၤထွဲဘၣ်ဒီး တၫ်ဂ့ၫ်လၢဟဲပိာ်ထွဲထီၣ်သးအခံတဖၣ်အဖီခိၣ် တဟံးန့ၫ်မူဒါဘၣ်အဂ့ၫ်စ့ၫ်ကီး လံာ်ဘိးဘၣ်ရၤလီၤအပူၤ ထုးထီၣ်ပာ်ဖျါဃာ်၀ဲန့ၣ်လီၤ.
photo: Dawna Column
