လါယူၤ(၇)သီ, ၂၀၂၄နံၣ်
သုးကီၣ်ကးအတၫ်ဒုးတဖၣ်အဃိ ဖဲလါမ့ၤ(၁)သီနံၤတုၤလါယူၤ(၆)သီနံၤ သးနံၣ်(၁၈)နံၣ်အဖီလာ် ဖိသၣ်(၂၄)ဂၤဘၣ်သံ၀ဲအဂ့ၫ် တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ (AAPP) ဘိးဘၣ်ပာ်ဖျါ၀ဲလီၤ.
ပှၤဘၣ်သံ(၂၄)ဂၤအကျါ ပိာ်မုၣ်(၅)ဂၤဒီး ပိာ်ခွါ(၁၉)ဂၤပာ်ဃုာ်၀ံၤ တၫ်အံၤအကျါ ကလံၤကျါတၫ်ခးလီၤ တၫ်အဃိ ပှၤဘၣ်သံ၀ဲ(၉)ဂၤန့ၣ်လီၤ.
လၢတၫ်မၤနီၣ်အံၤအပူၤ ဖဲလါယူၤ(၃)သီနံၤ လၢစကဲကီၫ်ခီ, ကီၫ်ဆၣ်မ့က့(မင်းကင်းမြို့နယ်), မတီသ၀ီ(မတောကျေးရွာ) တၫ်ဖျီ ကလံၤကျါတၫ်ခးလီၤတၫ်အပူၤ ဖိသၣ်လၢဘၣ်သံအနီၫ်ဂံၫ်နီၫ်ဒွး တၫ်မၤလီၤတံၫ်တန့ၫ်ဒံးဘၣ်အဃိ တဖၢနုာ်ဃုာ်၀ဲဘၣ်အဂ့ၫ် AAPP တဲ၀ဲလီၤ.
တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ (AAPP) အတၫ်မၤနီၣ်ထၢဖှိၣ်တၫ်ဂ့ၫ်တၫ်ကျိၤအဖီခိၣ် စးထီၣ်လၢ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ တုၤ၂၀၂၄နံၣ် လါယူၤ(၆)သီနံၤ ပှၤဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီဒီး ကမျၢၫ်ခဲလၢာ်ပာ်ဖှိၣ်(၅,၂၃၆)ဂၤ ဘၣ်သံ၀ဲန့ၣ်လီၤ.
photo:FBR
