လါယူၤ(၇)သီ, ၂၀၂၄နံၣ်
စးထီၣ်လၢ လါယူၤ(၂)သီအနံၤဒီး တုၤလၢလါယူၤ(၄)သီအနံၤ (၃)သီအတီၫ်ပူၤ သုးကီၣ်ကးသုးရ့ၣ်တဖၣ် ခးလီၤကျိဖးဒိၣ်အဖျၢၣ်(၄၀)ဘျဲၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဒူသထူၣ်ကီၫ်ရ့ၣ်, ကၠဲးထိၣ်ကီၫ်ဆၣ်အပူၤအဃိ ကမျၢၫ်တၫ်ဘၣ်ဒိးဘၣ်ထံးတဖၣ်အိၣ်၀ဲအသိး သ၀ီတစှၤန့ၫ်(၃)ဖျၢၣ်ပူၤ ကမျၢၫ်ဖိတဖၣ်ဘၣ်ဃ့ၫ်ပူၤဖျဲးအသးအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးထုးထီၣ်ပာ်ဖျါဃာ်၀ဲန့ၣ်လီၤ.
ဖဲလါယူၤ(၂)သီအနံၤ, ဂီၤ(၇း၃၀)ဃၣ်ဃၣ်အဆၢကတီၫ် သုးကီၣ်ကးအသုး (အမတ-၃၁၀)သုးရ့ၣ်ဒီး (ခမရ-၂၀၇)သုးရ့ၣ်လၢအိၣ်ဆီလီၤအသးဖဲ ၀့ၫ်လၢၫ်ကတံာ်(သိမ်ဇရပ်မြို့)တဖၣ် ခးလီၤကျိဖးဒိၣ်အဖျၢၣ်(၃၀)ဘျဲၣ်ဆူ ကၠဲးထိၣ်ကီၫ်ဆၣ်အပူၤအဃိ ကျိဖးဒိၣ်(၂)ဖျၢၣ် လဲၤလီၤတဲာ်ပိာ်ဖးထီၣ်၀ဲဒၣ်ဖဲ စ့းကွ့သ၀ီ(စစ်ကွင်းရွာ), ကိၣ်သါထိအဟံၣ်ပူၤ၀ံၤ ဟံၣ်ဟးဂီၤကွံာ်၀ဲအသိး ကိၣ်မၠိအဟံၣ်စ့ၫ်ကီး ကျိဖးဒိၣ်အက့အခီဘၣ်ဒီးဟးဂီၤကွံာ်၀ဲစ့ၫ်ကီးန့ၣ်လီၤ.
လါယူၤ(၃)သီအနံၤ, ဂီၤ(၁၁)နၣ်ရံၣ်ဃၣ်ဃၣ်အဆၢကတီၫ်စ့ၫ်ကီး သုးကီၣ်ကးအသုး ခးလီၤကျိဖးဒိၣ်(၁)ဖျၢၣ်လဲၤလီၤတဲာ်၀ဲဒၣ် ဖဲခယွဲကရူၫ်(ခရွဲကျေးနယ်), မိးခမီးသ၀ီ(မုက္ခမော့ကျေးရွာ), မဲၫ်တီၣ်ကၠံကိ(မယ်တော်ကြီးကုန်း)အကပၤ၀ံၤ ပှၤပိာ်မုၣ်တဂၤလၢအဟူးအသးအိၣ်(၆)လါ ခီၣ်အစ့ၣ်ခီၣ်ညါသး ကျိဖးဒိၣ်အက့အခီဘၣ်ဒီး ဘၣ်ဒိ၀ဲန့ၣ်လီၤ.
တကးဒံးဘၣ် လါယူၤ(၄)သီအနံၤစ့ၫ်ကီး ကၠဲးထိၣ်ကီၫ်ဆၣ်အပူၤ သုးကီၣ်ကးအသုး (အမတ-၃၁၀)သုးကလၢၤ ခးလီၤကျိဖးဒိၣ်အဖျၢၣ်(၁၀)ဒံးအဂ့ၫ် ခ့ၣ်အဲၣ်ယူၣ်-ကၠဲးထိၣ်ကီၫ်ဆၣ် တၫ်ကစီၣ်မူဒါခိၣ် တဲ၀ဲန့ၣ်လီၤ.
လၢကတီၫ်ခဲအံၤ သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ သုးကီၣ်ကးအသုးကလၢၤတဖၣ် ခးလီၤကျိဖးဒိၣ်တဖၣ်အဃိ ကၠဲးထိၣ်ကီၫ်ဆၣ်အပူၤ, ခယွဲကရူၫ်(ခယွဲကျေးနယ်), သိခွးသ၀ီ(သုံးခွရွာ), မိးခမီးသ၀ီ(မုက္ခမော့ရွာ)ဒီး စ့းကွ့သ၀ီ(စစ်ကွင်းရွာ)တဖၣ်ပူၤ လီၫ်က၀ီၤကမျၢၫ်တဖၣ် ဘၣ်ဃ့ၫ်ပူၤဖျဲးအသးအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲန့ၣ်လီၤ.
photo:KNU
