လါမ့ၤ(၇)သီ, ၂၀၂၄နံၣ်
သုးခိၣ်နၫ်တဖၣ် အတၫ်ဟံးန့ၫ်ဆူၣ်ထံကီၫ်တၫ်စိတၫ်ကမီၤ တၫ်ပိာ်ထွဲထီၣ်အခံန့ၣ် မ့ၫ်ဒၣ်ပှၤကီၫ်ပယီၤဖိတဖၣ် ကွၫ်ဆၢၣ်မဲာ်ဘၣ် တၫ်ဃံးတၫ်စ့ၤအကလုာ်ကလုာ်န့ၣ်လီၤ. လါမးရှး, လါအ့ဖြ့ၣ်ဒီး လါမ့ၤန့ၣ် မ့ၫ်ကီၫ်ပယီၤပူၤ လါတဖၣ်လၢတၫ်ကိၫ်ဆူၣ်လီၤ.
တၫ်အိၣ်သးဒ်သိးအံၤအဖီခိၣ် လၢထံကီၫ်ဒီတဘ့ၣ် တၫ်ကွၫ်ဆၢၣ်မဲာ်ဘၣ် လီမ့ၣ်အူ(လျှပ်စစ်မီး) တဟဲအသိး ထံကီၫ်အမုာ်ကျိၤ၀ဲၤကွာ်၀့ၫ်ခိၣ် အဒိၣ်ကတၢၫ်(နိုင်ငံ၏ အကြီးဆုံး စီးပွားရေးမြို့တော်) ပှၤ၀့ၫ်တကူၣ်ဖိတဖၣ်စ့ၫ်ကီး တူၫ်ဘၣ်တၫ်တမံၤဃီလီၤ. ၀့ၫ်တကူၣ်ပာ်ဃုာ် လၢ၀့ၫ်ဖးဒိၣ်တဖၣ်န့ၣ် တသီန့ၣ် သူဘၣ်လီမ့ၣ်အူ(လျှပ်စစ်မီး) ထဲဒၣ်(၄)နၣ်ရံၣ်ဧိၤလီၤ. တသီ(၂၄)နၣ်ရံၣ်အတီၫ်ပူၤ လီမ့ၣ်အူလၢတၫ်သူဘၣ်ထဲ(၄ )နၣ်ရံၣ်အံၤ ကဟဲအဆၢကတီၫ်ဖဲလဲၣ်န့ၣ် တၫ်တပာ်ပနီၣ်အီၤဘၣ်.
လၢကတီၫ်အံၤ ၀့ၫ်တကူၣ်ပာ်ဃုာ် လၢထံကီၫ်ဒီတဘ့ၣ်ပူၤ တၫ်ကိၫ်ဆူၣ်ထီၣ်၀ံၤ ညီနုၫ်တၫ်ကိၫ်အသဟီၣ် အိၣ်၀ဲဒၣ်လၢ (၄၀)ဒံၣ်ကရံၣ်စ့ၣ်တံၣ်ကရ့း(ဒီဂရီစင်တီဂရိတ်) ဆူအဖီခိၣ်ညါန့ၣ်လီၤ. တၫ်တဒိးန့ၫ်ဘၣ်လီမ့ၣ်အူ လၢလၢပှဲၤပှဲၤဘၣ်အဃိ ပှၤပှ့ၤ၀ဲဒၣ်မ့ၤ, သွဲၣ်လး(မီးသွေး), ကဲး(ဂက်စ်)ဒီး ထံလၢပှၤသူတဖၣ် အါထီၣ်၀ဲလီၤ. လၢတၫ်ကဟးဆှဲး တၫ်ကိၫ်အဂီၫ် ပှၤလဲၤအိၣ်ကဒုတစိၤတလီၫ်ဖဲ တၫ်ဆါတၫ်ပှ့ၤကျးဖးဒိၣ် (ဈေးဝယ်စင်တာ)တဖၣ် လၢအိးထီၣ်ဃာ် ကလံၤခုၣ်တဖၣ်အိၣ်အသိး လၢဟါခီစ့ၫ်ကီး တၫ်ထံၣ်ဘၣ်လၢကမျၢၫ်တဖၣ် ဟးထီၣ်ဆ့ၣ်နီၤ လၢကျဲမုၫ်ခိၣ် အိၣ်၀ဲန့ၣ်လီၤ.
တၫ်တဒိးန့ၫ်ဘၣ်ထံ လၢလၢပှဲၤပှဲၤ, တၫ်တဒိးန့ၫ်ဘၣ် န့ဆၢၣ်ဂာ်သ၀ံ(သဘာဝဓာတ်ငွေ့) လၢလၢပှဲၤပှဲၤဒီး လီမ့ၣ်အူအတၢၣ်(ဓာတ်အားလိုင်း)တဖၣ် ဘၣ်တၫ်မၤဟးဂီၤကွံာ်အီၤအဃိ ထံကီၫ်ဒီတဘ့ၣ်လီမ့ၣ်အူ တၫ်လိၣ်ဘၣ်န့ၣ် တၫ်ထုးထီၣ်န့ၫ်ဒၣ်ထဲ တ၀ာ်ဧိၤလီၤအဂ့ၫ် သုးကီၣ်ကး ဘိးဘၣ်ပာ်ဖျါ၀ဲလီၤ.
ref:myanmarnow
