လါအ့ဖြ့ၣ်(၂၄)သီ, ၂၀၂၄နံၣ်
ဖဲအပူၤကွံာ်စှၤသီ သုးကီၣ်ကးတကပၤ ဘၣ်ပာ်တ့ၫ်ကွံာ်၀ဲ အသုးကလၢၤ ခလရ-၂၇၅ လၢအအိၣ်ခိး၀့ၫ်ရၤမတံအံၤ ဖဲမဟါ လါအ့ဖြ့ၣ်(၂၃)သီနံၤ သုးကီၣ်ကးတကပၤ က့ၤထီထီၣ်က့ၤအနီၫ်တယၫ်အဂ့ၫ် ကၠီၣ်တဲၣ်တၫ်ကစီၣ်တကပၤ ပာ်ဖျါ၀ဲလီၤ. လၢတၫ်ကဟဲက့ၤထီထီၣ်နီၫ်တယၫ်ဒ်သိးအံၤအဂီၫ် စီၤခၠံးသူၣ်အကညီဒီကလုာ်သုးမုၫ်ဒိၣ်(KNA) မၤစၢၤ၀ဲအဂ့ၫ် တၫ်ကစီၣ်သန့တဖၣ်တဲ၀ဲလီၤ.
တၫ်သမံသမိးတၫ်ဂ့ၫ်တၫ်ကျိၤအဖီခိၣ် တၫ်ထံၣ်ဘၣ်ထဲသုးကီၣ်ကးအပှၤသုးဖိတဂၤ ဃုာ်ဒီးသုးကီၣ်ကးတၫ်စဲပနီၣ်အဂ့ၫ် ပာ်ဖျါ၀ဲလီၤ. တၫ်ကစီၣ်တဖၣ် ပာ်ဖျါ၀ဲအဖီခိၣ် KNA တကပၤ ကလဲၤနုာ်လီၤဆူ သုးကီၣ်ကးအသုးကလၢၤ ခလရ-၂၇၅အဂီၫ် ဃ့တၫ်ပျဲလၢ ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA)ဒီး သုးပာ်ဖှိၣ်အိၣ်၀ံၤ မၤ၀ဲဒ်သိးအံၤန့ၣ် KNLA သုးပာ်ဖှိၣ်တဖၣ် တသ့ၣ်ညါ၀ဲဘၣ်အဂ့ၫ် ပာ်ဖျါ၀ဲလီၤ.
KNU ပှၤတဲတၫ်ပၢ ပဒိၣ်စီၤတီနံတခီ, BGF(KNA)ကနုာ်လီၤဆူ ၂၇၅အဂီၫ် တဲ၀ဲ KNLAအဂ့ၫ်, သုးကီၣ်ကးအသုးဖိ ပာ်ဃုာ်တခီ တသ့ၣ်ညါ၀ဲဘၣ်တဲ၀ဲအဂ့ၫ် ကၠီၣ်တဲၣ်တၫ်ကစီၣ်ပူၤ ပာ်ဖျါ၀ဲလီၤ. ဖဲတၫ်သံကွၫ်လၢ KNLAတကပၤ ပၢဆှၢဃာ် သုးကလၢၤ-၂၇၅ ဒံးလီၤဧါတခီဒု ပဒိၣ်စီၤတီနံ တဲဆၢကဒါက့ၤ၀ဲလၢ သုးကီၣ်ကးအသုးလၢဟဲထီၣ်ဖဲကီးတရံးတဖၣ် တၫ်ကတြီဆၢအီၤလၢ တၫ်ဘၢၣ်စၢၤအဂီၫ် မ့ၫ်တၫ်ဆၢကတီၫ်လၢအရ့ဒိၣ်၀ဲအဂ့ၫ်န့ၣ်လီၤ.
KNLAသုးပာ်ဖှိၣ်တဖၣ်အံၤ ထီၣ်ဒုးမၤန့ၫ်၀ဲ သုးရ့ၣ်(၃)ရ့ၣ်, ပာ်ဃုာ် သ့ၣ်ခါညံၣ်နီၣ်ဒုးယၤသုးကလၢၤ(သင်္ဃန်းညီနောင် ဗျူဟာ)ဒီး ၀့ၫ်ရၤမတံအချၢ ခလရ-၂၇၅တဖၣ်လီၤ. တၫ်ကစီၣ်သန့အဂၤတဖၣ် ပာ်ဖျါ၀ဲအဖီခိၣ် ရၤမတံတိၤနီၫ်ဂံၫ်(၂) ခလရ-၂၇၅ သုးဖိတဖၣ် က့ၤဟံးန့ၫ်က့ၤ တၫ်လီၫ်လၢအသုးကလၢၤပူၤ၀ံၤ လၢတိၤ (လ၀က)၀ဲၤဒၢးဒီး တၫ်ကူၣ်လဲၤမၤကၤ၀ဲၤဒၢးတၫ်ဖံးတၫ်မၤ(ကုန်သွယ်ရေး ရုံးလုပ်ငန်း)တဖၣ် လဲၤတရံးသး ဒ်ညီနုၫ်အသိးန့ၣ်လီၤအဂ့ၫ် တဲ၀ဲလီၤ. သုးခိၣ်ဒိၣ်စိ စီၤခၠံးသူၣ် တခီ ရၤမတံ ကကဲထီၣ်ဟီၣ်က၀ီၤ တၫ်ကူၣ်လဲၤမၤကၤ လၢအိၣ်ဒီးတၫ်ဘံၣ်တၫ်ဘၢအဂီၫ် တၢၣ်ပီၣ်တဲသကိးတၫ်ဒီး သုးကီၣ်ကး အသုးရိၣ်မဲခိၣ်ကျၢၫ်ခံ စိ၀့(စိုး၀င်း)အဂ့ၫ် တၫ်သ့ၣ်ညါဘၣ်လီၤ.
