လါအ့ဖြ့ၣ်(၂)သီ, ၂၀၂၄နံၣ်
ကညီကီၫ်စဲၣ်, ၀့ၫ်ဖၣ်ပူၣ်, က၀ီၤဒ့နီၫ်ဂံၫ်(၂)ပူၤ မၠိးမးရွ့ၣ်ကၠီ(မြို့မရွှေကျောင်း) သီခါဖၠၣ် ဖဲလါမးရှး(၃၁)သီနံၤ သုးကီၣ်ကးအသုး လဲၤခးလၢကလံၤကျါအဃိ သီခါတပါပာ်ဃုာ် ကမျၢၫ်(၅)ဂၤ ခဲလၢာ်(၆)ဂၤ ဘၣ်သံ၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
စးထီၣ်ဖဲ လါမးရှး(၂၈)သီနံၤ ၀့ၫ်ဖၣ်ပူၣ်န့ၣ် KNLAဒီး PDFသုးပာ်ဖှိၣ်တဖၣ် ပၢဆှၢဃာ်၀ဲ၀ံၤအလီၫ်ခံ ဟဲခးလီၤတၫ်လၢကလံၤကျါ ဒ်သိးအံၤအဂ့ၫ်တဲ၀ဲလီၤ.
သီခါဖၠၣ်န့ၣ် ဘၣ်တၫ်ဟဲခးလီၤလၢကလံၤကျါ တစှၤန့ၫ်(၃)ဘျီဘၣ်၀ံၤ ကဃ့ၫ်ပူၤဖျဲးသးအဂီၫ် တၫ်ဆၢကတီၫ်တအိၣ်ဘၣ်အဃိ ဘၣ်သံ၀ဲဒ်သိးအံၤအဂ့ၫ် တၫ်ဘံၣ်တၫ်ဘၢအဖီခိၣ် လီၫ်က၀ီၤဖိလၢတအဲၣ်ဒိးပာ်ဖျါအမံၤတဂၤ တဲ၀ဲလီၤ.
“တၫ်ဒုးကဲထီၣ်၀ဲဖဲန့ၣ်လီၤ. ခးလီၤတၫ်လၢကလံၤကျါအဃိ ဘၣ်၀ဲလီၫ်က၀ီၤဖိတဖၣ်လီၤ. တနီၤန့ၣ် အမဲာ်သၣ်ဒၣ်လဲၣ် တၫ်ကွၫ်နီၣ်တဘၣ်လၢၤဘၣ်. တၫ်ဟဲတ့ၫ်လီၤမ့ၣ်ပိၫ်၀ံၤအလီၫ်ခံ လီၫ်က၀ီၤဖိတဖၣ် ဘၣ်သုးကဒီးအသးဆူ တၫ်ဘံၣ်တၫ်ဘၢအိၣ်အလီၫ်န့ၣ်လီၤ.”
ပှၤဘၣ်သံအကျါ သးနံၣ်(၂၀)နံၣ်ဃၣ်ဃၣ်အိၣ် ပိာ်မုၣ်(၂)ဂၤ, ပိာ်ခွါ(၂)ဂၤဒီး သီခါတပါပာ်ဃုာ်၀ံၤ သးနံၣ်မံၤသၣ်တခီ တၫ်တသ့ၣ်ညါဘၣ်လီၤတံၫ်ဘၣ်. Free Burma Rangers ကရၢလၢအိၣ်ဖဲ ကညီကီၫ်စဲၣ်ပူၤတဖၣ်တခီ ကလံၤကျါတၫ်ခးလီၤတၫ်အပူၤ ပှၤဘၣ်သံ(၆)ဂၤ၀ံၤ ဘၣ်ဒိဘၣ်ထံး တစှၤန့ၣ်(၁၅)ဂၤဘၣ်ဒိဘၣ်ထံးအဂ့ၫ် ဘိးဘၣ်ပာ်ဖျါ၀ဲလီၤ.
ဖဲလါမးရှး(၂၄)သီနံၤစ့ၫ်ကီး သုးကီၣ်ကးတပၤ ဟဲတ့ၫ်လီၤမ့ၣ်ပိၫ်လၢဒရိတဖၣ်အဃိ ၀့ၫ်ဖၣ်ပူၣ်, က၀ီၤဒ့နီၫ်ဂံၫ်(၁)အပူၤ ကမျၢၫ်(၂)ဂၤ ဘၣ်သံဒံးန့ၣ်လီၤ.
လၢဖၣ်ပူၣ် သုးကီၣ်ကးအသုး ကျိဖးဒိၣ်ဒီး ကလံၤကျါတၫ်ခးလီၤတၫ်တဖၣ်အဃိ လီၫ်က၀ီၤကမျၢၫ် (၂)ကထိဂၤ ဃၣ်ဃၣ် ဘၣ်ပာ်တ့ၫ်ကွံာ်တၫ်အိၣ်ဆိးလီၫ် ဃ့ၫ်ပူၤဖျဲးသးအဂ့ၫ် KNU – သုးက့နီၫ်ဂံၫ်(၅) တကပၤ ဖဲလါမးရှး(၃၁)သီနံၤန့ၣ် ဘိးဘၣ်ပာ်ဖျါဃာ်၀ဲလီၤ.
Ref: rfa
(Screenshot: Free Burma Rangers)
