လါအ့ဖြ့ၣ်(၂)သီ, ၂၀၂၄နံၣ်
Rafah ဟီၣ်က၀ီၤ ဘၣ်ထွဲအံၣ်စရ့အတၫ်လဲၤထီၣ်ဒုးန့ၣ် ကီၫ်အမဲရကၤ ဘၣ်ယိၣ်ဘၣ်ဘှီဘၣ်ကိၫ်ဘၣ်ဂီၤ၀ဲအဂ့ၫ် ထုးထီၣ်တဲဖျါ၀ဲဘၣ်ဆၣ် ကဆှၢလီၤ၀ဲမ့ၣ်ပိၫ်ဒီး ကဘီယူၤဒုးသုးလၢ လီၤလၢလၢ အမဲရကၤ စ့ဒီၣ်လၣ် လၢအဘံၣ်လံၣ်ယၣ်တဖၣ် လၢတယံာ်ဒံးဘၣ်န့ၣ် ပာ်ဂၢၫ်ပာ်ကျၢၤ၀ဲအဂ့ၫ် ဂံၫ်ခီၣ်ထံးတၫ်ကစီၣ်သန့ ခံခါတဲ၀ဲလီၤ.
အမဲရကၤ တကပၤ သုးတၫ်စုက၀ဲၤလၢ ကဟ့ၣ်လီၤ အံၣ်စရ့တဖၣ်အကျါ မ့ၣ်ပိၫ်လၢအတယၢၫ်အိၣ် ပီၣ်(၂၀၀၀) အဖျၢၣ်(၁၈၀၀)ဖျၢၣ်ဒီး ပီၣ်အတယၢၫ်(၅၀၀)အိၣ် အဖျၢၣ်(၅၀၀)ဘျဲၣ် ပာ်ဃုာ်၀ဲအဂ့ၫ် ဂံၫ်ခီၣ်ထံးတၫ်သစီၣ်သန့တဖၣ် ပာ်ဂၢၫ်ပာ်ကျၢၤ၀ဲလီၤ.
ကီၫ်အမဲရကၤန့ၣ် ဟ့ၣ်၀ဲအသိၣ်မှံၤထံကီၫ် အံၣ်စရ့ , သုးဂ့ၫ်၀ီတၫ်မၤစၢၤ ဒီလၣ်(၃.၈)ဘံၣ်လံၣ်ယၣ် ကိးမုၫ်နံၣ်ဒဲးန့ၣ်လီၤ. လၢကၣ်စၣ်(Gaza)ဟီၣ်က၀ီၤပူၤ တၫ်လဲၤတ့ၫ်လီၤမ့ၣ်ပိၫ်ဒီး ဟီၣ်ခိၣ်လိၤတၫ်ထီၣ်ဒုးအပူၤ အ့ၣ်စရ့န့ၣ် ဘၣ်တၫ်ပာ်ဒ့ၣ်ပာ်ကမၣ်အီၤလၢ ထံဂုၤကီၫ်ဂၤတဖၣ်၀ံၤ, ဖဲအမဲရကၤပဒိၣ်ကရၢဖိတနီၤ ဃ့ထီၣ် ကီၫ်ခိၣ်ကၠိဘဲၣ်တၣ်(သမ္မတ ဂျိုးဘိုင်ဒင်) လၢကဒီၣ်တဲာ်ကွံာ် အမဲရကၤ သုးဂ့ၫ်၀ီတၫ်မၤစၢၤအကတီၫ် ဟ့ၣ်မၤစၢၤဆီၣ်ထွဲ၀ဲဒ်သိးအံၤန့ၣ်လီၤ.
ကၣ်စၣ်ဟီၣ်က၀ီၤတၫ်ဒုး(ဂါဇာဒေသစစ်ပွဲ), အံၣ်စရ့ အတၫ်ထီၣ်ဒုးတဖၣ်အပူၤ ဘၣ်ထွဲဒီး အမဲရကၤ အတၫ်ဆီၣ်ထွဲမၤစၢၤတဖၣ်န့ၣ် ပှၤအၣ်ရးအမဲရကၤထံဖိကီၫ်ဖိ(အမေရိကန်အာရပ်)တဖၣ် သးဆါ၀ဲအဂ့ၫ်န့ၣ် ကီၫ်ခိၣ်ကၠိဘဲၣ်တၣ်(သမ္မတဂျိုးဘိုင်ဒင်)အၢၣ်လီၤ၀ဲလီၤ. အံၣ်စရ့ကိတိာ်ခိၣ်ကျၢၫ် (အစ္စရေး ဝန်ကြီးချုပ်) Benjamin Netanyahu အဃိ ကမျၢၫ်တဖၣ်အဘၢၣ်စၢၤ တၫ်သးတလီၤပလိာ်အိၣ်ထီၣ်အဖီခိၣ် အံၣ်စရ့ထံကီၫ်အဂီၫ် ဘၣ်ဟ့ၣ်ကဒီးတၫ်မၤစၢၤအဂ့ၫ် အ၀ဲအၢၣ်လီၤတူၫ်လိာ်၀ဲလီၤ.
အံၣ်စရ့ တၫ်ဒီသဒၢကိတိာ်(အစ္စရေး ကာကွယ်ရေးဝန်ကြီး) Yoav Gallant န့ၣ် လၢတယံာ်ဒံးဘၣ်အတီၫ်ပူၤ လဲၤဆူ ၀့ၫ်ခိၣ်၀ၣ်ရှ့ၣ်ထၢၣ်(ဝါရှင်တန်မြို့တော်)၀ံၤ တၢၣ်ပီၣ်တဲသကိးတၫ်ဒီး အမဲရကၤပှၤဘၣ်မူဘၣ်ဒါတဖၣ် ဘၣ်ထွဲသုးတၫ်စုက၀ဲၤတၫ်လိၣ်ဘၣ်တဖၣ်၀ံၤအလီၫ်ခံ အမဲရကၤ ဆၢတဲာ်လီၤ၀ဲဒ်သိးကဟ့ၣ်သုးဂ့ၫ်၀ီတၫ်မၤစၢၤဆူ အံၣ်စရ့န့ၣ်လီၤ. အမဲရကၤ-အံၣ်စရ့ တၫ်ဖ့ၣ်ဆၢတဖၣ် တၫ်မၤလီၤကဆှၣ်အီၤကန့ၫ်အဂီၫ် ဂဲၤလိာ်၀ဲ၀ံၤ ကီၫ်အမဲရကၤ အတၫ်ရ့လိာ်ဘၣ်ထွဲန့ၣ် မ့ၫ်တၫ်အရ့ဒိၣ်လၢ အံၣ်စရ့ထံကီၫ်တၫ်ဘံၣ်တၫ်ဘၢအဂီၫ် အဂ့ၫ် Yoav Gallant တဲဘၣ် ပှၤဟံးန့ၫ်တၫ်ကစီၣ်ဖိတဖၣ်န့ၣ်လီၤ.
