လါမးရှး(၁၅)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်တီအူ, တၫ်ပူသ၀ီကရူၫ်ပူၤ(လိပ်သိုအုပ်စု) တၫ်ဒုးအိၣ်ထီၣ်ကဲၤဘါသုးမုၫ်ဒိၣ်အဖီခိၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၂), ကီၫ်ရ့ၣ်တီအူ ပာ်ဖျါထီၣ်၀ဲအတၫ်ပာ်သးဖဲ လါမးၡး(၇)သီအနံၤန့ၣ်လီၤ.
တၫ်ဒုးအိးထီၣ်ကဲၤဘါ(ကယ်ဘား)သုးမုၫ်ဒိၣ်န့ၣ် မ့ၫ်ဒၣ်တၫ်ပညိၣ်ဒုးအိၣ်ထီၣ် ကလုာ်ဒူၣ်တၫ်သဘံၣ်သဘုၣ်, ကညီကလုာ်ကဒဲကဒဲကဒုးက့ၤလိာ်သးအဂီၫ်, သုးမီၤစိရိၤအသးသမူကထီအဂီၫ်ဒီး ပှၤနီၫ်တဂၤအတၫ်ကဲဘျုးလီၤအဂ့ၫ် ပာ်ဖျါဃာ်၀ဲန့ၣ်လီၤ.
“ပှၤလၢတီခိၣ်ရိၣ်မဲဒုးအိၣ်ထီၣ်ကဲၤဘါသုးမုၫ်ဒိၣ်(ကယ်ဘားတပ်မတော်)န့ၣ် မ့ၫ်ဒၣ်ပှၤအယံၤတဖၣ်ဟဲ၀ံၤ မၤဟူးထီၣ်သါလီၤ. ဒီးတကးဒံးဘၣ် မ့ၫ်စ့ၫ်ကီးသုးကီၣ်ကးအတၫ်ရဲၣ်တၫ်ကျဲၤလီၤ“ အဂ့ၫ် တီအူကီၫ်ရ့ၣ်, နဲၣ်ရွဲၣ်သဃဲၤ ပဒိၣ်စီၤသီတူၫ်ထူတဲဘၣ် အၣ်ထူခ့ၣ်န့ၣ်လီၤ.
တၫ်ထုးထီၣ်လံာ်ဘိးဘၣ်ရၤလီၤတဘ့ၣ်အံၤ မ့ၫ်ဒၣ်ပှၤလၢအတဲထီၣ်တဲလီၤတဖၣ်ဒီး ပှၤလၢကဟဲမၤတံာ်တာ် ခ့ၣ်အဲၣ်ယူၣ်တၫ်ပၢတၫ်ပြးတဖၣ် တၫ်ကဟံးန့ၫ်အီၤအရ့လၢ ကီၫ်သူလ့ၤတၫ်ဘျၢသဲစးအိၣ်အသိးအဂ့ၫ် တီအူကီၫ်ရ့ၣ်ပှၤဘၣ်မူဘၣ်ဒါတဲ၀ဲန့ၣ်လီၤ.
ဖဲအပူၤကွံာ်န့ၫ်၀့အစီၤကီၫ်ပယီၤသုးမုၫ်ဒိၣ် အတၫ်ဂီာ်စုဂီာ်ခီၣ်(သွေးထိုးလှုံဆော်မူ), တဲထီၣ်တဲလီၤအဖီခိၣ် ဒုးအိၣ်ထီၣ်၀ဲန့ၣ်လီၤ. အဂံၫ်အဘါတအိၣ်အါအါဘၣ်ဆၣ် ကညီကလုာ်ကျါတၫ်ဒုးလီၤဖးပှၤလၢ တၫ်ဘူၣ်တၫ်ဘါမ့ၫ်ဂ့ၤ, ကလုာ်ဒူၣ်အဘၢၣ်စၢၤမ့ၫ်ဂ့ၤန့ၣ် မ့ၫ်ဒၣ်ဒုၣ်ဒါတၫ်ရဲၣ်တၫ်ကျဲၤတဖၣ်လီၤအဃိ တၫ်ဒီသဒၢဆိပာ်လီၤအဂ့ၫ် အ၀ဲတဲ၀ဲန့ၣ်လီၤ.
“ကဲၤဘါသုးမုၫ်ဒိၣ်အိၣ်ထီၣ်၀ဲတဘျုးဘျီလံ. မ့မ့ၫ်လၢတၫ်ဟံးန့ၫ်ဂ့ၫ်၀ီတခီ တလိၣ်လၢခ့ၣ်အဲၣ်ယူၣ်ဟံးန့ၫ်ဂ့ၫ်၀ီဘၣ်. အ၀ဲသ့ၣ်န့ၣ်အတၫ်ဆၢထၢၣ်တဘၣ်ဘၣ်.ထံဖိကီၫ်ဖိတဆီၣ်ထွဲအီၤဘၣ်.ပှၤလၢအဃုနီၫ်တဂၤတၫ်ဘျုးတဖၣ် တီခိၣ်ရိၣ်မဲသးအဃိ အိၣ်ဒၣ်ကဲထီၣ်၀ဲတစိၤတလီၫ်ဒီး အကစၫ်ဟါမၣ်ကွံာ်ကွ့ၫ်ကွ့ၫ်လီၤ“ အဂ့ၫ် တီအူကီၫ်ရ့ၣ် ပှၤဘၣ်မူဘၣ်ဒါတဲ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, တီအူကီၫ်ရ့ၣ်, တၫ်ပူၤသ၀ီကရူၫ်(လိပ်သိုအုပ်စု)ပူၤ ဒူသ၀ီအိၣ်၀ဲ(၁၃)ဖျၢၣ်ဒီး မ့မ့ၫ်တၫ်တဲထီၣ်တဲလီၤတဖၣ်အိၣ်ဒၣ်ထဲ သ၀ီ(၁)ဖျၢၣ် (၂)ဖျၢၣ်န့ၣ်လီၤ.
ပှၤလၢတဲထီၣ်တဲလီၤတဖၣ်န့ၣ် မ့ၫ်ပှၤလၢအိၣ်လၢ၀့ၫ်ပူၤဒီး တၫ်ဟးကရၢကရိလၢ Social Media ပူၤအဃိ သုးကီၣ်ကးတပၤ ဟံးန့ၫ်တၫ်ခွဲးတၫ်ယာ်အဖီခိၣ် သုးကီၣ်ကးတပၤ ဟ့ၣ်၀ဲတၫ်သိၣ်လိအဂ့ၫ် အ၀ဲနၫ်ဟူ၀ဲဒ်န့ၣ်အဂ့ၫ်ဒီး ပှၤလၢအထီၣ်တၫ်သိၣ်လိ၀ံၤတဖၣ်စ့ၫ်ကီး တၫ်ဆှၢအီၤဆူ တၫ်ဒုးမဲာ်သး(စစ်မြေပြင်)တၫ်လီၫ်အဂၤတဖၣ်အဂ့ၫ် အ၀ဲတဲ၀ဲနၫ်ဟူ၀ဲဒ်န့ၣ်အဂ့ၫ် တဲ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၂), ကီၫ်ရ့ၣ်တီအူ, တၫ်ပူသ၀ီကရူၫ်ပူၤ တၫ်ဒုးအိၣ်ထီၣ်ကဲၤဘါသုးမုၫ်ဒိၣ် ဖဲ ၁၉၅၃နံၣ်တဘျီ, ဖဲ၁၉၆၈-၆၉နံၣ်တဘျီဒီး ဖဲလၢ ၁၉၉၇နံၣ်န့ၣ်တဘျီ တၫ်ဒုးအိၣ်ထီၣ်တ့ၫ်၀ဲ(၃)ဘျီဃၣ်ဃၣ်ဒီး တၫ်ပညိၣ်ဒုးအိၣ်ထီၣ်အီၤ မ့ၫ်ဒၣ်နီၫ်ကစၫ်တၫ်ကဲဘျုးလီၤအဃိ လၢခံကတၢၫ်လီၤပှီၫ်ကွံာ်၀ဲန့ၣ်လီၤ.
