လါမးရှး(၁၄)သီ, ၂၀၂၄နံၣ်
ဖဲ၂၀၂၄နံၣ်, လါမးၡး(၇)သီအနံၤ, ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)သုးပာ်ဖှိၣ်လဲၤထီၣ်ဒုး သုးကီၣ်ကးအသုးလၢအိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ကီၫ်ဆၣ်ရၤမတံ, သ့ၣ်ခါညံၣ်နီၣ်(ခမရ-၃၅၅)သုးရ့ၣ်သုးကလၢၤအပူၤ သုးကီၣ်ကး အပှၤသုးဖိသံ၀ဲ(၁၉)ဂၤ၀ံၤ တၫ်မၤန့ၫ်စ့ၫ်ကီးကျိချံပှာ်သၣ်အါအါဂီၫ်ဂီၫ်အဂ့ၫ် ခ့ၣ်အဲၣ်ယူၣ်-ဒူပျာ်ယာ်ပာ်ဖျါဃာ်၀ဲန့ၣ်လီၤ.
တၫ်သမံသမိး သုးကီၣ်ကးအပှၤသုးဖိတၫ်သံတၫ်ပှၫ် အနီၫ်ဂံၫ်နီၫ်ဒွးအဖၢမုၫ်ဒံးလီၤအသိး တၫ်ဘၣ်ဒိဘၣ်ထံးစ့ၫ်ကီးအိၣ်၀ဲအါအါဂီၫ်ဂီၫ်အဂ့ၫ် ပာ်ဖျါဃာ်၀ဲန့ၣ်လီၤ.
တၫ်ထီၣ်ဒုးမၤန့ၫ် သ့ၣ်ခါညံၣ်နီၣ်(ခမရ-၃၅၅)သုးရ့ၣ်အပူၤ တၫ်မၤန့ၫ်ကျိအါအါဂီၫ်ဂီၫ်တကးဘၣ် ကျိဖးဒိၣ်တဖၣ်လၢအမ့ၫ် ငကၠ့မံ ကျိစဲး, 81 mm/MA-14(ရဲၣ်ဖဲၣ်), 60 mm ခိၣ်မၣ်ဒိၣ်စ့ၣ်ပၠီ(ကွန်မန်ဒိုစိန်ပြောင်း), 60 mm ဆ့ၣ်နီၤစ့ပၠီ, 81 mmစ့ၣ်ပၠီ, RPGတဖၣ်ပာ်ဃုာ် မ့ၣ်ပိၫ်မၤဟးဂီၤသုးသိလ့ၣ်ထးဒီး မ့ၣ်ပိၫ်ယီၫ်အါအါဂီၫ်ဂီၫ်ပာ်ဃုာ်၀ဲအဂ့ၫ် တၫ်သ့ၣ်ညါဘၣ်လၢတၫ်ပာ်ဖျါအဖီခိၣ်န့ၣ်လီၤ.
မ့မ့ၫ်လၢ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)သုးပာ်ဖှိၣ်တပၤ သံ၀ဲ(၆)ဂၤ, ဘၣ်ဒိဆူၣ်ဆူၣ်ကလၢၣ်(၄)ဂၤ ဒီး ဘၣ်ဒိတၫ်ဘၣ်ယိၣ်တအိၣ်(၄)ဂၤအဂ့ၫ် ပာ်ဖျါဃာ်၀ဲန့ၣ်လီၤ.
တၫ်ဒုးကဲထီၣ်သးကတီၫ် သုးကီၣ်ကးတပၤ ဟဲခးလီၤစၢၤတၫ်လၢကဘီယူၤ, ခးလီၤ၀ဲကျိဖးဒိၣ်တဖၣ်တပယုာ်ဃီအဃိ ကမျၢၫ်လၢတၫ်ကမၣ်တအိၣ်(၁၀)ဂၤဃၣ်ဃၣ်သံ၀ဲ၀ံၤ တၫ်ဘၣ်ဒိဘၣ်ထံးအိၣ်၀ဲအါအါဂီၫ်ဂီၫ်အဂ့ၫ် ခ့ၣ်အဲၣ်ယူၣ်-ဒူပျာ်ယာ်ပာ်ဖျါဃာ်၀ဲန့ၣ်လီၤ.
