လါမးရှး(၅)သီ, ၂၀၂၄နံၣ်
စးထီၣ် ဖဲ၂၀၂၁နံၣ်, လါဖ့ၤဘြူၤအါရံၤ(၁)သီအနံၤ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီး တုၤလၢ ၂၀၂၄နံၣ်, လါဖ့ၤဘြူၤအါရံၤ(၂၈)သီအနံၤ, (၃)နံၣ်ဘျဲၣ်အတီၫ်ပူၤ သုးကီၣ်ကး အတၫ်မၤအၢမၤသီတဖၣ်အဃိ ပှၤပိာ်မုၣ် ခဲလၢာ်ပာ်ဖှိၣ်(၈၀၆)ဂၤ သံ၀ဲအဂ့ၫ် ကီၫ်ပယီၤပိာ်မုၣ်ကရၢ (BWU) ပာ်ဖျါဃာ်၀ဲဖဲ မဟါအနံၤန့ၣ်လီၤ.
သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ၀ံၤအလီၫ်ခံဒီးတုၤမုၫ်မဆါတနံၤအံၤ ပိာ်မုၣ်လၢတၫ်ဖီၣ်န့ၫ်ဆူၣ်အီၤဒီး တၫ်သံတၫ်ပှၫ်တဖၣ်အိၣ်ထီၣ်တဘိယုၫ်ဃီအဂ့ၫ် တဲ၀ဲန့ၣ်လီၤ.
စးထီၣ်လၢ၂၀၂၁နံၣ်, လါဖ့ၤဘြူၤအါရံၤ(၁)သီအနံၤ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီးတုၤလၢ ၂၀၂၄နံၣ်, လါဖ့ၤဘြူၤအါရံၤ(၂၈)သီအနံၤ, (၃)နံၣ်ဘျဲၣ်အတီၫ်ပူၤ ပိာ်မုၣ်လၢ တၫ်ပာ်လီၤဃိၣ်ပူၤ(ပြစ်ဒဏ်ချမှတ်ခံရသူ)အိၣ်၀ဲ(၇၈၁)ဂၤ, ပိာ်မုၣ်လၢသံ အိၣ်၀ဲ(၈၀၆)ဂၤဒီး တၫ်ဖီၣ်န့ၫ်ပၢဆှၢဃာ်အီၤ(ဖမ်းဆီးခံရမူ)ခဲလၢာ်အိၣ်၀ဲ (၃၃၃၂)ဂၤန့ၣ်လီၤ. မ့မ့ၫ်ဟီၣ်ခိၣ်မဲာ်ဖံးခိၣ်(မြေပြင်)တခီ တၫ်သံတၫ်ပှၫ်ဒီး တၫ်ဖီၣ်န့ၫ်ဆူၣ်တဖၣ် ကအါန့ၫ်ဒံးအလီၫ်န့ၣ်လီၤ.
(၃)နံၣ်ဘျဲၣ်အတီၫ်ပူၤ ပိာ်မုၣ်လၢအသံတဖၣ်အံၤ ခီဖျိလၢသုးကီၣ်ကး လဲၤဒုးတၫ်လၢကလံၤကျါ, ခးကျိဖးဒိၣ်တဖၣ်, တၫ်ခးသံအီၤတဖၣ်, တၫ်ဒုးလီၤဃိၣ်ပူၤကတီၫ်သံ၀ဲ, တၫ်ဒုးလီၤဃိၣ်ပူၤကတီၫ်တၫ်ခးသံအီၤ ဒီးတၫ်ဒုးလီၤဃိၣ်ပူၤကတီၫ်တၫ်ဒွဲၣ်အူဃာ်အီၤတဖၣ်အဃိ သံ၀ဲအဂ့ၫ်ပာ်ဖျါဃာ်၀ဲန့ၣ်လီၤ.
လါဖ့ၤဘြူၤအါရံၤအတီၫ်ပူၤ ပှၤလၢတၫ်ဖီၣ်န့ၫ်ဆူၣ်အီၤတဖၣ်အံၤ မ့ၫ်သုးကီၣ်ကး ပဲာ်အၢပဲာ်သီအီၤလၢ တၫ်ကွဲးဖျါထီၣ်တၫ်ကစီၣ်အကမၣ်လၢ ပှၤတ၀ၢလံာ်ကပျံးပၤ(လူမှုကွန်ရက်)အဖီခိၣ်ဒီး ပှၤလၢကွဲးဖျါထီၣ် ဘၣ်ဃးမၠီးခ့ၣ်ယါ(မြောက်ခင်ရန်း) သ၀ီပိာ်ခွါ(၂)ဂၤ တၫ်ဒွဲၣ်အူမၤသံကွံာ်အဂ့ၫ်တဖၣ်စ့ၫ်ကီး တၫ်ဖီၣ်အီၤအိၣ်န့ၣ်လီၤ. တကးဘၣ် တၫ်ပဲာ်အၢပဲာ်သီအီၤဒ် အမ့ၫ်ပှၤတၫ်ပၢၫ်ဆၢဖိအသိးဒီး တၫ်ဖီၣ်န့ၫ်အီၤတဖၣ်စ့ၫ်ကီးအိၣ်၀ဲအဂ့ၫ် BWU ပာ်ဖျါဃာ်၀ဲန့ၣ်လီၤ.
တၫ်ဂ့ၫ်တၫ်ကျိၤလၢတၫ်ပာ်ဖျါထီၣ်တဖၣ်အံၤ တၫ်ဟံးန့ၫ်အီၤလၢ တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ(AAPP)ဒီး တၫ်ကစီၣ်သန့တဖၣ်အအိၣ်အဂ့ၫ် ပာ်ဖျါဃာ်၀ဲန့ၣ်လီၤ.
တၫ်ဂီၤ – သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ (၃)နံၣ်ဘျဲၣ်အတီၫ်ပူၤ သုးကီၣ်ကး လဲၤဒုးတၫ်လၢကလံၤကျါဒီး ကျိဖးဒိၣ်တဖၣ်အဃိ ခ့ၣ်အဲၣ်ယူၣ်တၫ်ပၢဟီၣ်က၀ီၤပူၤ ပိာ်မုၣ်လၢဘၣ်ဒိဘၣ်ထံးဒီးတၫ်သံတၫ်ပှၫ်တဖၣ်
photo:KHRG
