လါဖ့ၤဘြူၤအါရံၤ ၂၆သီႇ ၂၀၂၄နံၣ်
ကီၫ်ကၠီၣ်တဲၣ်န့ၣ် ကီၫ်ပယီၤဂ့ၫ်၀ီတၫ်ဟူးတၫ်ဂဲၤတဖၣ် အိၣ်ခိးကွၫ်၀ဲ၀ံၤ လၢကတီၫ်အံၤ တမ့ၫ်တၫ်အိၣ်သးလၢအၢအၢသီသီဒံးဘၣ်အဂ့ၫ် ကၠီၣ်တဲၣ်တၫ်ဒီသဒၢကိတိာ်(ထိုင်းကာကွယ်ရေးဝန်ကြီး) Sutin Klungsang တဲလီၤ၀ဲအဂ့ၫ် VOA တၫ်ကစီၣ်သန့ ပာ်ဖျါ၀ဲလီၤ. ၦၤလၢဟူးဂဲၤထီဒါ သုးကီၣ်ကးဒီး ၦၤကီၫ်ပယီၤဖိလၢဟဲသုးလီၫ်သုးကျဲတဖၣ် တၫ်တကြၢးပၢဆှၢရဲၣ်ကျဲၤအီၤ ထဲသိးတုၤသိး(တန်းတူ)ဘၣ်န့ၣ် ကၠီၣ်တဲၣ်တၫ်ဒီသဒၢကိတိာ် Sutin Klungsang တဲလီၤ၀ဲဖဲ အပူၤကွံာ်(၂၃)သီအနံၤအဂ့ၫ် Bangkok Post တၫ်ကစီၣ်သန့ကွဲးဖျါ၀ဲလီၤ.
တၫ်အိၣ်ဆီလီၤအသးလၢ ကီၫ်ကၠီၣ်တဲၣ်ပူၤ၀ံၤ တၫ်ဟူးတၫ်ဂဲၤလၢထီဒါသုးကီၣ်ကးတဖၣ် လၢကတီၫ်အံၤ တၫ်အိၣ်သးလၢလီၤဘၣ်ယိၣ်တအိၣ်ဘၣ်အဂ့ၫ်, ၦၤလၢအိၣ်လၢကီၫ်ပယီၤဒီး ဟဲဃ့ၫ်နုာ်လီၤဆူ ကၠီၣ်တဲၣ်ပူၤ အနီၫ်ဂံၫ်နီၫ်ဒွးစ့ၫ်ကီး တမ့ၫ်အါကဲၣ်စိးဘၣ်အဂ့ၫ်, အ၀ဲသ့ၣ်တဖၣ် တယံာ်ဘၣ်န့ၣ် ကက့ၤကဒါက့ၤဆူ ကီၫ်ပယီၤအဂ့ၫ် ကၠီၣ်တဲၣ်တၫ်ဒီသဒၢကိတိာ် တဲ၀ဲန့ၣ်လီၤ.
သးစၫ်လၢဒိၣ်တုာ်ခိၣ်ၦဲၤခဲလၢာ် ကဘၣ်ကဲသုးတၫ်ဘျၢ သုးကီၣ်ကး ထုးထီၣ်ဘိးဘၣ်ရၤလီၤ၀ဲ၀ံၤအလီၫ်ခံ ကီၫ်ကၠီၣ်တဲၣ်အပူၤ ၦၤကီၫ်ပယီၤဖိ ဟဲနုာ်လီၤအါအါဂီၫ်ဂီၫ်တအိၣ်ဘၣ်အဂ့ၫ် အ၀ဲတဲလီၤ၀ဲ၀ံၤ ကၠီၣ်တဲၣ်ပူၤ တၫ်ကနုာ်လီၤအိၣ်ဆိးအဂီၫ် မ့ၫ်ထဲၦၤကီၫ်ပယီၤဖိလၢသုးလီၫ်သုးကျဲတဖၣ် ကအိၣ်ဆိးလၢအနံၣ်ယံာ်တဖၣ်အပူၤန့ၣ်လီၤ.
ဖဲလါဖ့ၤဘြူၤအါရံၤ (၂၃)သီအနံၤ ကၠီၣ်တဲၣ်တၫ်ဒီသဒၢကိတိာ် ဖဲဟဲတုၤလၢ ကၠီၣ်တဲၣ်, တး(ခ်)ကီၫ်ဆၣ် (Tak ပြည်နယ်) အကတီၫ်တဲ၀ဲဒ်န့ၣ်လီၤ. ၦၤလၢဟဲဃ့ၫ်ဟးထီၣ်လၢကီၫ်ပယီၤပူၤ ကိးဂၤဒဲး တမ့ၫ်ၦၤလၢထီဒါသုးကီၣ်ကးဘၣ်အဂ့ၫ်, ၦၤကိးဂၤဒဲးတၫ်မ့ၫ်ကွၫ်အီၤလၢတၫ်ထံၣ်ဒ်သိးန့ၣ်ဒီး တၫ်နီၤဖးတၫ်အဒူၣ်အဆၢတဖၣ် ဟဲအိၣ်ထီၣ်သ့အဂ့ၫ် တၫ်ဒီသဒၢကိတိာ် Sutin Klungsangတဲ၀ဲန့ၣ်လီၤ.
ref:voa
photo:frontiermyanmar
