ဖဲလါဖ့ၤဘြူၤအါရံၤ (၁၅)သီအနံၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဖၣ်အၣ်ကီၫ်ဆၣ်, နိးလီၫ်ပျီသ၀ီ(ရေအေးရွာ)ပူၤ သုးကီၣ်ကး ခးလီၤကျိဖးဒိၣ်အဃိ လီၫ်က၀ီၤကမျၢၫ်(၂)ဂၤဘၣ်ဒိ၀ဲအဂ့ၫ် ခ့ၣ်အဲၣ်ယူၣ်ပာ်ဖျါဃာ်၀ဲဖဲ မဟါအနံၤန့ၣ်လီၤ.
သုးကီၣ်ကးခီၣ်ချ့သုးရ့ၣ် (ခမရ-၂၀၈)လၢ အိၣ်ဆီလီၤအသးဖဲ ဖၣ်ပူၣ်ကီၫ်ဆၣ်, ကမးမီ၀့ၫ်(ကမမောင်းမြို့)အံၤ ခးလီၤကျိဖးဒိၣ်(၆)ဖျၢၣ်အဂ့ၫ် ပာ်ဖျါဃာ်၀ဲဖဲ အလံာ်ဘိးဘၣ်ပာ်ဖျါအပူၤန့ၣ်လီၤ.
လၢတၫ်ခးလီၤကျိဖးဒိၣ်အဃိ သးနံၣ်(၃၅)နံၣ်အိၣ် နီၫ်ဆၢ၀ါဒီး သးနံၣ်(၅၈)နံၣ် နီၫ်မးပၠါတဖၣ် ဘၣ်ဒိ၀ဲန့ၣ်လီၤ. တကးဘၣ် ကမျၢၫ်အိၣ်ဟံၣ်(၆)ဖျၢၣ်စ့ၫ်ကီး ဟးဂီၤကွံာ်၀ဲအဂ့ၫ် ပာ်ဖျါဃာ်၀ဲန့ၣ်လီၤ.
လၢန့ၣ်အမဲာ်ညါ သုးကီၣ်ကးခီၣ်ချ့သုးရ့ၣ် (ခမရ-၂၀၈)လၢ အိၣ်ဆီလီၤအသးဖဲ ဖၣ်ပူၣ်ကီၫ်ဆၣ်, ကမးမီ၀့ၫ်တဖုအံၤ ပညိၣ်ခးလီၤကျိဖးဒိၣ်ဆူ ခ့ၣ်အဲၣ်ယူၣ်-ဖၣ်အၣ်ကီၫ်ဆၣ်ဟီၣ်က၀ီၤပူၤ ကမျၢၫ်အိၣ်ဆိးလီၫ်ကျဲ, ဖံးအီၣ်မၤအီၣ်လီၫ်ကျဲတဖၣ်အဃိ ကမျၢၫ်တၫ်ဘၣ်ဒိဘၣ်ထံး, တၫ်သံတၫ်ၦၫ်, ဟံၣ်ဃီဒီး တၫ်ဘူၣ်တၫ်ဘါတၫ်သူၣ်ထီၣ် တၫ်ဟးဂုၤဟးဂီၤ, ကမျၢၫ်တၫ်ဖံးအီၣ်မၤအီၣ်လီၫ်ကျဲဒီး တၫ်မုၫ်တၫ်ဘိတဖၣ်ဟးဂီၤကွံာ်၀ဲအဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ဖဲ ၂၀၂၃နံၣ်, စးထီၣ်လၢ လါယနူၤအါရံၤ ဒီးတုၤလီၤလၢ လါဒံၣ်စ့ဘၢၣ်အတီၫ်ပူၤ ထံကီၫ်ဒီတဘ့ၣ်ပူၤ သုးကီၣ်ကးမၤ၀ဲကလံၤကျါတၫ်ဒုး(လေကြောင်းတိုက်ခိုက်မူ)(၁၂၂၈)ဘျီအဃိ လီၫ်က၀ီၤကမျၢၫ်သံ၀ဲ (၆၁၃)ဂၤ ဒီး ဘၣ်ဒိဘၣ်ထံး၀ဲ(၇၅၁)ဂၤအဂ့ၫ် ညၣ်လ့သ့းတၫ်ဃိထံသ့ၣ်ညါကရၢ (ဥာဏ်လင်းသစ်သုတေသနအဖွဲ့)ပာ်ဖျါဃာ်၀ဲန့ၣ်လီၤ.
photo:knu
