ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်, လၢၫ်၀ါကရူၫ်တီၤခၢၣ်သးကၠိ မၤ၀ဲကၠိပျၫ်အမူးတၫ်ရဲၣ်တၫ်ကျဲၤ ဖဲ ၂၀၂၄နံၣ်,လါဖ့ၤဘြူၤအါရံၤ ၁၄သီအနံၤ, ဂီၤ(၈)နၣ်ရံၣ်အဆၢကတီၫ်အဂ့ၫ် ဂံၫ်ခီၣ်ထံးတၫ်ကစီၣ်တဂၤတဲ၀ဲန့ၣ်လီၤ.
တၫ်စးထီၣ်တၫ်ရဲၣ်တၫ်ကျဲၤအမူးလၢ တၫ်မၤလိနံၣ် ၂၀၂၃-၂၀၂၄နံၣ် တၫ်သိၣ်လိဒီတနံၣ် တၫ်ဘူၣ်တၫ်ဘါ, တၫ်စံးဘျုးစံးဖှိၣ်တၫ်ရဲၣ်တၫ်ကျဲၤန့ၣ်လီၤ. ခံပတီၫ်တပတီၫ်န့ၣ် တၫ်မၤ၀ဲတၫ်ဟ့ၣ်လီၤခိၣ်ဖးဒီး တၫ်ဟ့ၣ်ကနၢၤတဖၣ် ဆူကၠိဖိလၢဖျိထီၣ်ဒီး ကၠိဖိလၢအန့ၫ်ခိၣ်ဖးတဖၣ်န့ၣ်လီၤ. ဒီး ကၠိဖိဒီး ကၠိဖိမိၫ်ပၫ်တဖၣ် မၤလၤကပီၤက့ၤ၀ဲစ့ၫ်ကီး ကၠိသရၣ်, သရၣ်မုၣ်တဖၣ်လၢ တူၫ်ဆါခီၣ်ဆါအသးဒီး ဟ့ၣ်လီၤအသးလၢ တၫ်သိၣ်လိဒီတနံၣ်ညါအပူၤန့ၣ်လီၤ.
ကၠိကမံးတံာ်တဖၣ်, လၢၫ်ဒိၣ်ကီၫ်ဆၣ် ကညီကူၣ်သ့ဆဲးလၤ၀ဲကျိၤ(KECD)ခိၣ်နၫ်တဖၣ် လဲၤဟ့ၣ်ဂံၫ်ဟ့ၣ်ဘါစံးကတိၤလီၤတၫ်ဆူ ကၠိဖိတဖၣ်န့ၣ်လီၤ. တကးဘၣ် ကၠိဖိမိၫ်ပၫ်တဖၣ်စ့ၫ်ကီး ကတိၤစံးဘျူးက့ၤကၠိသရၣ်ဒိၣ်တဖၣ်ဒီး ကၠိသရၣ်, သရၣ်မုၣ်တဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ. တၫ်ပျၫ်ကၠိအမူးတၫ်ရဲၣ်တၫ်ကျဲၤ ၀ံၤအလီၫ်ခံ ကၠိဖိမိၫ်ပၫ်တဂၤစုာ်စုာ်ဟဲစိာ် မ့ၤဒီးကသူတဖၣ် ပာ်ဖှိၣ်ထီၣ်အသးဒီး အီၣ်သကိးအီသကိး၀ဲအဂ့ၫ် အ၀ဲတဲ၀ဲန့ၣ်လီၤ.
ခီဖျိလၢ သုးကီၣ်ကးဟဲခးလီၤတၫ်လၢကလံၤကျါဒီး ခးလီၤကျိဖးဒိၣ်တဖၣ်အဃိ ကၠိဖိတဖၣ်ဘၣ်လဲၤထီၣ်၀ဲ ကၠိဖဲၦၫ်ပူၤ၀ံၤ တၫ်ဟဲမၤက့ၤကၠိပျၫ်အမူးလၢ လၢၫ်၀ါကရူၫ်တီၤခၢၣ်သးကၠိအပူၤန့ၣ်လီၤ. မ့မ့ၫ် ၂၀၂၄-၂၀၂၅နံၣ် တၫ်သိၣ်လိနံၣ်အပူၤ ကၠိဖိတဖၣ်ကစှၤလီၤ၀ဲအဂ့ၫ်, ခီဖျိလၢ တၫ်ဒုးတၫ်ယၤတဖၣ်အဃိ ကွၫ်ဆၢၣ်မဲာ်ဘၣ်တၫ်ကီတၫ်ခဲ, ကလံၤကျါဒီး ကျိဖးဒိၣ်တၫ်လီၤဘၣ်ယိၣ်တဖၣ်အဃိ ဘၣ်ဃ့ၫ်ပူၤဖျဲးသးဒီး ဘၣ်ထီၣ်က့ၤ၀ဲဒၣ်ကၠိလၢၦၫ်ပူၤအဃိ ကၠိဖိမိၫ်ပၫ်တဖၣ်ကဆှၢက့ၤအဖိတဖၣ်ဆူ ကၠိအဂၤအိၣ်၀ဲအဂ့ၫ် ဂံၫ်ခီၣ်ထံးတၫ်ကစီၣ် တဲ၀ဲန့ၣ်လီၤ.
သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ၀ံအလီၫ်ခံ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်ပူၤ သုးကီၣ်ကးအတၫ်ဟဲခးလီၤတၫ်လၢကလံၤကျါဒီး ကျိဖးဒိၣ်တဖၣ်အဃိ ကမျၢၫ်တၫ်သံတၫ်ၦၫ်, တၫ်ဘၣ်ဒိဘၣ်ထံး, ကမျၢၫ်အိၣ်ဟံၣ်ဃီတၫ်သူၣ်ထီၣ်တဖၣ်ဒီး ကမျၢၫ်စုလီၤခီၣ်ခိၣ်တဖၣ် တၫ်ဟးဂုၤဟးဂီၤအိၣ်ထီၣ်၀ဲအါမးန့ၣ်လီၤ.
photo:CJ
