တၫ်ကဘၣ်ကဲသုးတၫ်ဘျၢ အ့ၣ်ယၣ်၀တံၣ်(ဧရာဝတီ)လီၫ်က၀ီၤကမျၢၫ်တဖၣ် တတူၫ်လိာ်၀ဲဘၣ်ဒီးကခီၣ်ဆၢက့ၤ၀ဲ

တၫ်ကဘၣ်ကဲသုးတၫ်ဘျၢလၢ သုးကီၣ်ကးပာ်လီၤ၀ဲအံၤ အ့ၣ်ယၣ်၀တံၣ်ကီၫ်ခီ(ဧရာဝတီတိုင်းဒေသကြီး)ကမျၢၫ်တဖၣ် တတူၫ်လိာ်၀ဲဘၣ်ဒီး ကခီၣ်ဆၢကဒါက့ၤ၀ဲလၢ ကျဲတဘိဘိအဂ့ၫ် တဲ၀ဲန့ၣ်လီၤ.

“အခဲအံၤန့ၣ် မၤပျံၤမၤဖုး၀ဲလၢတတြီတတြၫ်(မတရားခြိမ်းခြောက်)လီၤ. ကမျၢၫ်တတူၫ်လိာ်၀ဲနီတဂၤဘၣ်.ဟံၣ်အဒူၣ်တဖၣ် ကဲထီၣ်တၫ်သူၣ်တမံသးတမံလီၤ. ဖိခွါစ့ၫ်ကီးတၫ်ဘၣ်ကွၫ်ထွဲ၀ဲဂ့ၤဂ့ၤလီၤ. အ၀ဲသ့ၣ်ခါဆူညါတၫ်မုၫ်လၫ်တအိၣ်လီၤမၫ်ကွံာ်လံန့ၣ် ယသ့ၣ်ညါလီၤတံၫ်လီၤ. တၫ်ဘၣ်အိၣ်ဃိကလာ်ဒီး ဘၣ်သံအလီၫ်ဆိကမိၣ်လၢကမၤထီၣ်ဖျဲးကွံာ်ဒီးကသံ၀ဲ(ရုန်းပြီးအသေခံဖို့)အဂ့ၫ်” ပၫ်တဂၤလၢ အိၣ်ဖဲ၀့ၫ်ပသံၣ်(ပုသိမ်မြို့)တဂၤတဲ၀ဲန့ၣ်လီၤ.

တၫ်ပာ်လီၤ တၫ်ကဘၣ်ကဲသုးတၫ်ဘျၢ၀ံၤအလီၫ်ခံ အ့ၣ်ယၣ်၀တံၣ်ကီၫ်ခီအပူၤ သုးကီၣ်ကးပၢဆှၢတၫ်သမံသမိးတြဲၤတဖၣ် မၤတၫ်သမံသမိးၦၤသးစၫ်ဟးထီၣ်လ့ၣ်လိၤတဖၣ်၀ံၤ က၀ီၤဒ့တဖၣ်အပူၤစ့ၫ်ကီး တၫ်ထၢၦၤနီၫ်ဂံၫ်စရီ (လူဦးရေစာရင်း)တဖၣ် အိၣ်၀ဲအဂ့ၫ် တၫ်သ့ၣ်ညါဘၣ်လၢ ကမျၢၫ်တဖၣ်အအိၣ်န့ၣ်လီၤ.

“တၫ်ဂ့ၫ်လၢတၫ်ကဘၣ်ဒိဘၣ်ထံးဖိလံၤတဖၣ်န့ၣ် တူၫ်လိာ်တန့ၫ်ဘၣ်. မ့ၫ်တၫ်မၤတခါလၢတတြီတတြၫ်(မတရားလုပ်ရပ်)လီၤ. မ့ၫ်တၫ်မၤဟးဂီၤ ဖိလံၤအတၫ်ခါဆူညါ(ကလေးတွေအနာဂတ်)လီၤ. ဟံးန့ၫ်တၫ်စိတၫ်ကမီၤလီၤ. အခဲအံၤ တၫ်မ့ၫ်မၤကဒီးတၫ်တတြီတတြၫ်န့ၣ် တၫ်ကခီၣ်ဆၢက့ၤအီၤလၢ ကျိၤကျဲတဘိဘိအဂ့ၫ်” မိၫ်တဂၤလၢ အိၣ်ဖဲ ကၠီကိကီၫ်ဆၣ်(ကျောင်းကုန်းမြို့နယ်)တဂၤ တဲ၀ဲန့ၣ်လီၤ.

ကီၫ်ခီ(တိုင်း)ဒီး ကီၫ်စဲၣ်(ပြည်နယ်) ကမျၢၫ်တၫ်ကဲသုးကရၢ(ပြည်သူ့စစ်မှုထမ်းအဖွဲ့)အံၤ ဘၣတၫ်ကရၢကရိ ဒုးအိၣ်ထီၣ်အီၤလၢ ကီၫ်ခီဒီးကီၫ်စဲၣ် ကိတိာ်ခိၣ်ကျၢၫ်န့ၣ် မ့ၫၦၤပၢၤလီၫ်ဆ့ၣ်နီၤ(ဥက္ကဋ္ဌ), ကီၫ်ခီခိၣ်(ခံ)န့ၣ မ့ၫၦၤပၢၤလီၫ်ဆ့ၣ်နီၤ(ခံ)-(၁)တဂၤ (ဒုဥက္ကဋ္ဌ-၁), ကီၫ်ဆၢတၫ်ဘံၣ်တၫ်ဘၢကိတိာ်(နယ်လုံဝန်ကြီး)န့ၣ မ့ၫၦၤပၢၤလီၫ်ဆ့ၣ်နီၤ(ခံ)-(၂)ဂၤတဂၤ, ၦၤဂ့ၫ်၀ီကိတိာ်(လူမှုရေးဝန်ကြီး), တၫ်ဘျၢခိၣ်ကျၢၫ်(ဥပဒေချုပ်), ကီၫ်ခီပၢၤကီၫ်ခိၣ်တဖၣ်(တိုင်းရဲမှူးတို့) မ့ၫ်ကရၢဖိတဖၣ် ဒီး မ့မ့ၫ်ကီၫ်ခီပၢပြးခိၣ်နၫ်တခီ မ့ၫ်နဲၣ်ရွဲၣ်ခိၣ်ကျၢၫ်တဖၣ်အဂ့ၫ် သုးကီၣ်ကး ဘိးဘၣ်ရၤလီၤဃာ်၀ဲဖဲ လါဖ့ၤဘြူၤအါရံၤ (၁၄)သီအနံၤန့ၣ်လီၤ.

သုးကီၣ်ကးအံၤ တၫ်ကကဲသုးလၢ ဂၢၤကီၫ်သုး(ပြည်သူ့စစ်)ပူၤအဂီၫ် တၫ်ကစးထီၣ်ကိးအီၤလၢ လါအ့ဖြ့ၣ်ဒီး တၫ်သိၣ်လိၣ်တဘျီ တၫ်ကပာ်ပနီၣ်၀ဲ ၦၤနီၫ်ဂံၫ်(၅)ကထိ၀ံၤ တၫ်ကဘၣ်ကဲသုးန့ၣ် တၫ်ပာ်ပနီၣ်အီၤလၢ (၂)နံၣ်အဂ့ၫ် ထုးထီၣ်ရၤလီၤဃာ်၀ဲန့ၣ်လီၤ. အ့ၣ်ယၣ်၀တံၣ်ကီၫ်ခီအပူၤ လါဖ့ၤဘြူၤအါရံၤ တၢတနွံအတီၫ်ပူၤ ၀့ၫ်ပသံၣ် စဲးဖီကဟၣ်ပီညါ(နည်းပညာ), ခီၣ်ဖၠူထၢၣ်(ကွန်ပျူတာ) ဒီး ပသံၣ်ဖၠၣ်စိမိၤ(ပုသိမ်တက္ကသိုလ်) သရၣ်, သရၣ်မုၣ်တဖၣ်, ကၠိဖိမုၣ်, ကၠိဖိခွါတဖၣ် တၫ်ဟ့ၣ်၀ဲသုးတၫ်သိၣ်လိတဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.

ref:DVB