ဘၣ်ထွဲကီၫ်ပယီၤ ကၠီၣ်တဲၣ်မီၫ်သီ၀ဲၤဒၢး(ထိုင်းသံရုံး) လၢအိၣ်ဖဲ၀့ၫ်တကူၣ်န့ၣ် တသီအတီၫ်ပူၤ ၦၤလၢပတံထီၣ်တၫ်နုာ်လီၤကီၫ်ဘံၣ်စၣ်(ဗီဇာ)တဖၣ် တၫ်ကတူၫ်လိာ်အီၤထဲဒၣ်အဂၤ(၄၀၀)လီၤအဂ့ၫ် ကၠီၣ်တဲၣ်မီၫ်သီ၀ဲၤဒၢး ဘိးဘၣ်ပာ်ဖျါ၀ဲ ဖဲလါဖ့ၤဘြူၤအါရံၤ(၁၄)သီအနံၤန့ၣ်လီၤ.
ကသူ၀ဲတၫ်ရဲၣ်လီၤသးသနူ(တန်းစီစနစ်)၀ံၤ ၀ဲၤဒၢးတၫ်ဆၢကတီၫ်(ရုံးချိန်) ဂီၤ(၈)နၣ်ရံၣ်တခီ တချူးဘၣ်န့ၣ် ကနီၤလီၤန့ၫ်၀ဲနီၫ်ဂံၫ်ပနီၣ်(Token)တဖၣ်အဂ့ၫ်တဲ၀ဲလီၤ. နီၫ်ဂံၫ်ပနီၣ်(Token)တဖၣ် တၫ်မ့ၫ်ဆီတလဲဟ့ၣ်ခီဆူၦၤအဂၤ မ့တမ့ၫ် မၤအယီၤအဘျၣ်(အတု)မ့ၫ်အိၣ်န့ၣ် ကဖၢနုာ်၀ဲလၢၦၤမံၤဟးဂီၤစရီ(အမည်ပျက်စာရင်းသွင်း)ပူၤအဂ့ၫ် တဲ၀ဲလီၤ.
ဘံၣ်စၣ်(ဗီဇာ)န့ၣ် စးထီၣ်ဖဲဂီၤ(၉)နၣ်ရံၣ် တၫ်ကတူၫ်လိာ်အီၤလၢ ကၠီၣ်တဲၣ်မီၫ်သီ၀ဲၤဒၢး၀ံၤ ၦၤလၢတီၣ်ထီၣ်ဃာ် နီၫ်ဂံၫ်ပနီၣ်(Token)တဖၣ်ဒီး ၦၤလၢတီၣ်ထီၣ်လံာ်ပတံထီၣ်တဖၣ်(လျှောက်ထားသူ) အလံာ်ခီကီၫ်(ပတ်စ်ပို့) ဖိးမံလိာ်အသးအိၣ်တအိၣ် တၫ်ကသမံသမိး၀ဲအဂ့ၫ်တဲ၀ဲလီၤ.
ဖဲလါဖ့ၤဘြူၤအါရံၤ အသီ(၁၀)အနံၤ သုးကီၣ်ကးဒုးမူထီၣ်က့ၤ ကမျၢၫ်တၫ်ဘၣ်ကဲသုးတၫ်ဘျၢ(ပြည်သူ့စစ်မှုထမ်း ဥပဒေ)၀ံၤအလီၫ်ခံ ၦၤအဲၣ်ဒိးဟးထီၣ်လၢထံကီၫ်အချၢဒီး လဲၤနုာ်လီၤအိၣ်လၢကီၫ်အဂၤ ဟဲအိၣ်အါထီၣ်၀ဲအဂ့ၫ် ၦၤ၀့ၫ်တကူၣ်ဖိတဖၣ်တဲ၀ဲလီၤ.
လၢကီၫ်ကၠီၣ်တဲၣ် ၀့ၫ်ကံၫ်မဲအပူၤ ဘူးဒးဖၠၣ်စိမိၤကၠိ( ဗုဒ္ဓတက္ကသိုလ်)လၢ ကၠိတၫ်လၢာ်ဘူၣ်လၢာ်စ့ၤစှၤအံၤအပူၤစ့ၫ်ကီး ၦၤပတံထီၣ်တၫ်အါထီၣ်အဃိ ကီၫ်ပယီၤလံာ်ပတံထီၣ်(မြန်မာနိုင်ငံက လျှောက်လွှာ)တဖၣ် တတူၫ်လိာ်၀ဲလၢၤဘၣ်အဂ့ၫ် ဖဲလါဖ့ၤဘြူၤအါရံၤ(၁၄)သီအနံၤန့ၣ် ဘိးဘၣ်ပာ်ဖျါ၀ဲလီၤ.
သုးကီၣ်ကးၦၤတဲတၫ်ပၢ သုးခိၣ်ဒိၣ်ဂီၫ်ဂ့ၫ် စီၣ်မ့ထိတခီ ကမျၢၫ်တၫ်တကဲသုးတသ့သနူ(စစ်မှုမထမ်းမနေရ စနစ်)န့ၣ် လၢလါအ့ဖြ့ၣ်အပူၤ ၀ဲၤဒၢးတၫ်အိၣ်ဘှံး( ရုံးပိတ်ရက်)၀ံၤအလီၫ်ခံ ကစးထီၣ်၀ဲ၀ံၤ တၫ်ထီၣ်တၫ်မၤလိတဘျီန့ၣ် ကကိး၀ဲၦၤယဲၫ်ကထိဂၤအဂ့ၫ် ဖဲBBC(မြန်မာပိုင်း), တၫ်ကစီၣ်သန့ သံကွၫ်အီၤအကတီၫ် စံးဆၢက့ၤ၀ဲန့ၣ်လီၤ.
ref:rfa
