ဖဲလါဖ့ၤဘြူၤအါရံၤ(၁၃)သီအနံၤန့ၣ် တၫ်ကဲသုးအဂီၫ် ကမျၢၫ်တဖၣ် တၫ်ကဃုထၢကိးအီၤအဂ့ၫ်န့ၣ် သုးကီၣ်ကး ကရၢကရိဒုးအိၣ်ထီၣ် ကမျၢၫ်တၫ်ကဲသုးလီၫ်ခၢၣ်သးကရၢ(ပြည်သူ့စစ်မှုထမ်းဗဟိုအဖွဲ့)
လံန့ၣ်လီၤ. တၫ်ကဲသုးအဂီၫ် တၫ်ကထၢဖှိၣ်ၦၤအသီအဂီၫ် ဖဲတါလီၤ၀ဲၤဒၢးဟ့ၣ်တၫ်အိၣ်ဘှံးအကတီၫ်(သင်္ကြန်ရုံးပိတ်ရက်) လါအ့ဖြ့ၣ်အပူၤ တၫ်ကစးထီၣ်၀ဲအဂ့ၫ် သုးကီၣ်ကးၦၤတဲတၫ်ပၢ သုးခိၣ်ကျၢၫ်ဂီၫ်ဂ့ၫ်စီၣ်မ့ထိ တဲ၀ဲအဂ့ၫ် BBC(မြန်မာပိုင်း), တၫ်ကစီၣ်သန့ပာ်ဖျါ၀ဲလီၤ.
ကမျၢၫ်တၫ်ကဲသုးလီၫ်ခၢၣ်သးကရၢန့ၣ် သုးကီၣ်ကးအတၫ်ဒီသဒၢကိတိာ်ခိၣ်ကျၢၫ် (စစ်ကောင်စီကာကွယ်ရေးဝန်ကြီး) ကတီခိၣ်ရိၣ်မဲ၀ဲလီၤ. ထံဖိကီၫ်ဖိကိးဂၤ လၢသးနံၣ်ၦဲၤထီၣ် ကဘၣ်ကဲသုးတဖၣ် တၫ်ကကိးဃီၤအီၤ၀ံၤ ကဘၣ်တီၣ်ထီၣ်ဃာ်အနီၫ်ကစၫ်တၫ်ဂ့ၫ်တၫ်ကျိၤလီၤ. တၫ်တီၣ်ထီၣ်နီၫ်ကစၫ်တၫ်ဂ့ၫ်တၫ်ကျိၤအဂီၫ် တၫ်ကဘၣ်ထုးထီၣ်န့ၫ်အီၤ ခိၣ်ဂီၤ(မှတ်ပုံတင်လက်မှတ်)န့ၣ်လီၤ.
ခီဖျိသုးမီၤစိရိၤလီၫ်လံၤ(အာဏာရှင်ဟောင်း) သုးခိၣ်ဒိၣ်ဂီၫ်ဂ့ၫ်အူသါရွ့ၣ် အတၫ်ကလုၫ်အဖီခိၣ် ဖဲ၂၀၁၀နံၣ်န့ၣ် ကွဲးပာ်လီၤဃာ်၀ဲ၀ံၤ သုးကီၣ်ကးန့ၣ် ဖဲ၂၀၂၄နံၣ်, လါဖ့ၤဘြူၤအါရံၣ်အသီ(၁၀)အနံၤန့ၣ် ဒုးအိၣ်ထီၣ်က့ၤ၀ဲအသးသမူ(အသက်သွင်း)ဒီး ကမျၢၫ်တၫ်ကဲသုးတၫ်ဘျၢအဖီခိၣ် ကရၢအ၀ဲအံၤန့ၣ် တၫ်ကဲသုးအဂီၫ် ၦၤလၢဖိးမံလိာ်သးဒီး တၫ်ပာ်ပနီၣ်တဖၣ် တၫ်ကထုးထီၣ်န့ၫ်အီၤခိၣ်ဂီၤ(မှတ်ပုံတင်လက်မှတ်)၀ံၤ ၦၤလၢကဘၣ်ကဲသုးတဖၣ်စ့ၫ်ကီး တၫ်ကကိးဃီၤအီၤလီၤ.
ကမျၢၫ်တၫ်ကဲသုးတၫ်ဘျၢအဖီခိၣ် ပိာ်ခွါသးနံၣ်(၁၈)နံၣ်တုၤ (၃၅)နံၣ်ဒီး ပိာ်မုၣ်သးနံၣ်(၁၈)နံၣ်တုၤ (၂၇)နံၣ်အတီၫ်ပူၤတဖၣ် တၫ်ကကိးဃီၤအီၤလီၤ.
သုးကီၣ်ကး မ့ၫ်ပာ်ပနီၣ်လၢ ၦၤသ့ၦၤဘၣ်တခီ ပိာ်ခွါန့ၣ် သးနံၣ်(၁၈)နံၣ်တုၤ (၄၅)နံၣ်အတီၫ်ပူၤ မ့မ့ၫ်ပိာ်မုၣ်န့ၣ် သးနံၣ်(၁၈)နံၣ်တုၤ (၃၅)နံၣ်အတီၫ်ပူၤတဖၣ်အဂ့ၫ် ပာ်ပနီၣ်ဃာ်၀ဲလီၤ.
တၫ်ကဲသုးတၫ်ဆၢကတီၫ်န့ၣ်မ့ၫ်(၂)နံၣ်၀ံၤ တၫ်မ့ၫ်ပာ်ပနီၣ်လၢဂ့ၫ်ဂီၫ်အူတၫ်အိၣ်သးတခီ(အရေးပေါ်အခြေအနေ) တၫ်ဘၣ်ကဲသုးတၫ်ဆၢကတီၫ် တၫ်မၤအါထီၣ်သ့၀ဲတုၤလၢ(၅)နံၣ်န့ၣ်လီၤ. တၫ်မ့ၫ်ဂ့ၫ်လိာ် တၫ်ဘၣ်ကဲသုးန့ၣ် တၫ်ဒုးလီၤဃိာ်(ထောင်ဒဏ် ), (၅)နံၣ်သ့အဂ့ၫ် တၫ်ဘျၢ၀ဲအံၤအပူၤ ကွဲးလီၤဃာ်၀ဲန့ၣ်လီၤ.
တၫ်ဘျၢၦၤကူၣ်ဘၣ်ကူၣ်သ့(ဥပဒေပညာရှင်)တဖၣ် ပဲာ်ထံနီၤဖး၀ဲအဖီခိၣ် ကမျၢၫ်တၫ်ဘၣ်ကဲသုးတၫ်ဘျၢန့ၣ် စးထီၣ်ဖဲ၂၀၂၄နံၣ်, လါဖ့ၤဘြူၤအါရံၣ်အသီ(၁၀)အနံၤန့ၣ် အစိကမီၤပၢ(အာဏာတည်)၀ဲအဂ့ၫ် ခီဖျိလၢတၫ်ဘျၢအဆၢဒိၣ်(၁) အဆၢဒိၣ်အဒ့(ခ)အဖီခိၣ် ပာ်ပနီၣ်၀ဲလီၤ.
တၫ်န့ၣ်အဃိ တၫ်လၢတဲ၀ဲ ထံကီၫ်တၫ်အိၣ်မုာ်ဆိးပၢၤဒီး တၫ်ဂုၤထီၣ်ပသီထီၣ်ကီၣ်ကး (နိုင်ငံတော်အေးချမ်းသာယာရေးနဲ့ ဖွံ့ဖြိုးရေးကောင်စီ) တၫ်ဘျၢနီၫ်ဂံၫ် ၂၇/၂၀၁၀ တၫ်ဘျၢအဆၢဒိၣ်(၁), အဆၢဒိၣ်အဒ့(ခ) တၫ်မ့ၫ်က့ၤကွၫ်အီၤန့ၣ် တၫ်ဘျၢအံၤ ထံကီၫ်တၫ်အိၣ်မုာ်ဆိးပၢၤဒီး တ်ဂုၤထီၣ်ပသီထီၣ်ကီၣ်ကး ၦၤပၢၤလီၫ်ဆ့ၣ်နီၤ(ဥက္ကဌ) မ့ၫ်ထုးထီၣ်လံာ်တၫ်ကလုၫ် (အမိန့်ကြော်ငြာစာ)မးဒီး ဖဲတၫ်ပာ်ပနီၣ်မုၫ်နံၤ၀ဲန့ၣ် တၫ်စိတၫ်ကမီၤကပၢ(အာဏာတည်)၀ဲအဂ့ၫ် ပာ်ဖျါ၀ဲလီၤ.
လၢတၫ်အဃိ လံာ်ခံဘ့ၣ် တၫ်မ့ၫ်ထိၣ်သတြီၤကွၫ်န့ၣ် အခီၣ်ထံးတၫ်ဘျၢ ၂၇/၂၀၁၀အဖီခိၣ် ထံကီၫ်တၫ်အိၣ်မုာ်ဆိးပၢၤဒီး တၫ်ဂုၤထီၣ်ပသီထီၣ်ကီၣ်ကး ၦၤပၢၤလီၫ်ဆ့ၣ်နီၤ(ဥက္ကဌ) မ့ၫ်ထုးထီၣ်လံာ်တၫ်ကလုၫ်မးဒီး တၫ်စိတၫ်ကမီၤကပၢ(အာဏာတည်) ၀ဲန့ၣ်လီၤ. လၢကတီၫ်အံၤ တမ့ၫ် ထံကီၫ်တၫ်အိၣ်မုာ်ဆိးပၢၤဒီး တၫ်ဂုၤထီၣ်ပသီထီၣ်ကီၣ်ကး ပၢတၫ်အဆၢကတီၫ်အသိး, အူသါရွ့ၣ်စ့ၫ်ကီး ဆဲးလီၤစုမုၫ်ကျၢၫ် ထုးထီၣ်ဘိးဘၣ်ပာ်ဖျါ၀ဲတန့ၫ်လၢၤဘၣ်.
တၫ်ဘျၢ၀ဲန့ၣ် အဆၢဒိၣ်(၁) အဆၢဒိၣ်အဒ့(ခ)န့ၣ် မ့အီၣ်လဲၣ်စ့ၫ်ကီး ပာ်ပနီၣ်၀ဲတန့ၫ်ဘၣ်. လၢတၫ်ဘျၢအပူၤ ထံကီၫ်တၫ်အိၣ်မုာ်ဆိးပၢၤဒီး တၫ်ဂုၤထီၣ်ပသီထီၣ်ကီၣ်ကး ၦၤပၢၤလီၫ်ဆ့ၣ်နီၤ မ့ၫ်ထုးထီၣ်လံာ်တၫ်ကလုၫ်မးဒီး တၫ်စိတၫ်ကမီၤကပၢ၀ဲလီၤန့ၣ် ပာ်ဃုာ်ဖျိဖျိဖျါဖျါလံန့ၣ်လီၤ.
လၢတၫ်န့ၣ်အဃိ လၢတၫ်ဘျၢတကပၤ မ့ၫ်တၫ်လၢကမၣ်၀ံၤ မ့ၫ်တၫ်လံၣ်တၫ်လီ ထုးထီၣ်ဘိးဘၣ်ရၤလီၤ တၫ်ဘျၢလီၤ.အဃိ ဖဲ ၂၀၂၄နံၣ်, အသီ(၁၀)အနံၤ သုးကီၣ်ကး ဘိးဘၣ်ရၤလီၤ ကမျၢၫ်တၫ်ဘၣ်ကဲသုးတၫ်ဘျၢန့ၣ် အပူၤကွံာ်တၫ်ဘိးဘၣ်ရၤလီၤအခွဲးယာ်တအိၣ်အသိး သုးကီၣ်ကး အတၫ်ဘိးဘၣ်ရၤလီၤတၫ်ဘျၢအံၤ မ့ၫ်တၫ်ဘျၢလၢတဖိးသဲစးအသိး ၂၀၁၀နံၣ် တၫ်ဘျၢန့ၣ် မၤလံၣ်မၤလီ၀ဲဒီး မ့ၫ်တၫ်ဘျၢလၢအယီၤအဘျၣ်(အတုအယောင် ဥပဒေ)တခါလီၤအဂ့ၫ် တၫ်ဘျၢၦၤကူၣ်ဘၣ်ကူၣ်သ့တဖၣ် ပဲာ်ထံနီၤဖး၀ဲန့ၣ်လီၤ.
ref:myanmarnow
