တၫ်ထီဒါ တၫ်ကဘၣ်ကဲသုးတၫ်ဘျၢ(ပြည်သူ့စစ်မှုထမ်းဥပဒေ)၀ံၤ ၦၤလၢအဲၣ်ဒိးဟဲနုာ်လီၤလၢ PDFသုးပူၤအါအဃိ တၫ်ဘၣ်ကတဲာ်ကတီၤဃာ်ပာ်၀ဲအဂ့ၫ် သုးက့နီၫ်ဂံၫ်(၄), ကညီဒီကလုာ်ဂၢၤသးကရၢ(ကရင်အမျိူးသားကာကွယ်ရေးတပ်-KNDO) ၦၤဘၣ်မူဘၣ်ဒါတဂၤ တဲ၀ဲန့ၣ်လီၤ.
ဖဲ လါဖ့ၤဘြူၤအါရံၤ (၁၀)သီအနံၤ သုးကီၣ်ကး ထုးထီၣ်ရၤလီၤ တၫ်ကဘၣ်ကဲသုးတၫ်ဘျၢ(စစ်မှုထမ်းဥပဒေ )၀ံၤအလီၫ်ခံ တၫ်ဘၣ်ကတဲာ်တီၤဃာ်၀ဲအဂ့ၫ် KNDOၦၤဘၣ်မူဘၣ်ဒါတဂၤ တဲ၀ဲန့ၣ်လီၤ.
“သုးက့နီၫ်ဂံၫ်(၄), သုးရ့ၣ်(၇)ဟီၣ်က၀ီၤပူၤ PDFဒီး (ပကဖ)တဖၣ်အိၣ်၀ဲလီၤ. အ၀ဲသ့ၣ်ဒီး ပ၀ဲသ့ၣ် ပာ်ဖှိၣ်ဒုးယၤရဲၣ်ကျဲၤတဖၣ်စ့ၫ်ကီးအိၣ်လီၤ. အခဲအံၤ သုးကီၣ်ကး ပာ်လီၤ၀ဲတၫ်ဘျၢအဖီခိၣ် ၦၤလၢကဟဲနုာ်လီၤလၢ PDFပူၤတဖၣ် တၫ်ကရၢကရိတဖုစုာ်စုာ် ကသမံသမိးဃုထၢ၀ဲလီၤ. ၦၤဟဲမ့ၫ်အါတခီ လၢအ၀ဲသ့ၣ် ကအိၣ်ဂၢၤဆိးကျၢၫ်ဒီး အတၫ်ဘံၣ်တၫ်ဘၢကအိၣ်အဂီၫ် ပကဘၣ်ကတဲာ်ကတီၤပာ်ဃာ်၀ဲအဂ့ၫ်“ အ၀ဲတဲ၀ဲန့ၣ်လီၤ.
တၫ်ကဘၣ်ကဲသုးတၫ်ဘျၢ၀ဲအံၤ ဟူး၀းဆှဲးဆှိးထီၣ်၀ဲ ကမျၢၫ်လၢတၫ်ဘၣ်ထွဲတအိၣ်ဒီးထံရူၫ်ကီၫ်သဲးတဖၣ်စ့ၫ်ကီး၀ံၤ ၦၤလၢအဲၣ်ဒိးဟဲနုာ်လီၤလၢ PDFပူၤတဖၣ် တူၫ်လိာ်မုာ်၀ဲဂ့ၤဂ့ၤအဂ့ၫ် ဘျံးကီၫ်ရ့ၣ်(မြိတ်ခရိုင်), သုးရ့ၣ်(၁) ၦၤဘၣ်မူဘၣ်ဒါတဂၤ တဲ၀ဲန့ၣ်လီၤ.
“ပတၫ်တကဲထီၣ် အနီၫ်ကီၫ်ဒံးဘၣ်. ပတူၫ်လိာ်သ့ၣ်ဧါ, တသ့ဧါ ဒီး ကျိာ်စ့တၫ်အိၣ်သးတပၤစ့ၫ်ကီး အဒူၣ်အဆၢအိၣ်လီၤ. ဒီးတၫ်အိၣ်ဆိးလီၫ်ကျဲလီၤ. ၦၤလၢဟဲနုာ်တဖၣ်အဂီၫ် ပတအဲၣ်ဒိး မၤ၀ံၤတၫ်မံၤဘၣ်. မ့မ့ၫ်သုးကီၣ်ကးတခီ ဟီၣ်လာ်ထုးတီ(တွင်းထွက်သယံဇာတ)တဖၣ်အိၣ်လီၤ. ကီၫ်ချၢစ့တၫ်ဟဲနုာ်လီၤတဖၣ်စ့ၫ်ကီးအိၣ်လီၤ. မ့မ့ၫ် ပ၀ဲတခီ ပဒိးသန့ၤဂဲၤဆၢထၢၣ်လၢ ကမျၢၫ်တၫ်မၤစၢၤတခါလီၤအဃိ အဒူၣ်အဆၢအိၣ်၀ဲ“ အဂ့ၫ် အ၀ဲတဲ၀ဲန့ၣ်လီၤ.
တၫ်ပာ်ဂၢၤပာ်ကျၢၤ ကမျၢၫ်တၫ်ကဘၣ်ကဲသုးတၫ်ဘျၢ၀ံၤအလီၫ်ခံ သုးကီၣ်ကး ဟးဖီၣ်န့ၫ်ဆူၣ် ၦၤသးစၫ်တဖၣ်လၢ ၀့ၫ်တနီၤဒီး ၦၤဟးထီၣ်လ့ၤလိၤတဖၣ်အဃိ ကမျၢၫ်တဖၣ်ဘၣ်အိၣ်လၢတၫ်ဘၣ်ယိၣ်ဘၣ်ဘှီန့ၣ်လီၤ.
ref:MPA
