ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅), မုၫ်တြီၫ်ကီၫ်ရ့ၣ်ဟီၣ်က၀ီၤပူၤ KNLA တီခိၣ်ရိၣ်မဲသုးပာ်ဖှိၣ်တဖၣ် ထီၣ်ဒုးဖျိးကွံာ် သုးကီၣ်ကးအစုတီၤဖီလာ်အသုးကလၢၤတဖၣ် ဒီး တၫ်က၀ီၤခးဒီၣ်တဲာ်ကွံာ်အတၫ်လဲၤတၫ်က့ၤ, တၫ်အီၣ်အကျဲဒီး ဒၢၣ်အီထံအကျဲတဖၣ်လၢ ဆၢကတီၫ်ယံာ်ဒီး တၫ်ဘၣ်ဆှၢန့ၫ်က့ၤတၫ်အီၣ်တၫ်အီလၢ ကဘီယူၤအဃိ တၫ်ကီတၫ်ခဲဘၣ်အီၤဒိၣ်ဒိၣ်မုၫ်မုၫ်အဖီခိၣ် ပာ်တ့ၫ်ကွံာ်အသုးကလၢၤအါဖျၢၣ်အဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
လၢတၫ်အိၣ်သးဒ်သိးအံၤအဖီခိၣ် ဖဲ ၂၀၂၄နံၣ်, လါဖ့ၤဘြူၤအါရံၤ(၁၀)သီအနံၤ, ဂီၤ(၆)နၣ်ရံၣ်အဆၢကတီၫ် သုးကီၣ်ကးအသုး (ခမရ-၃၄၉) လၢအိၣ်ဆီၤလီၤအသးဖဲ လၢၫ်ကျ့ကၠိ(လယ်ကလေးကျိုး)အံၤ ပာ်တ့ၫ်ကွံာ်အသုးကလၢၤဒီး က့ၤပာ်ဖှိၣ်အသးဆူ မုၫ်တြီၫ်ကီၫ်ရ့ၣ်, လူၫ်သီကီၫ်ဆၣ်(လူသောမြို့နယ်) ကၠူၣ်လူၫ်သုးကလၢၤ (ကျူလူတပ်စခန်း)အဂ့ၫ် ပာ်ဖျါဃာ်၀ဲန့ၣ်လီၤ.
လၢန့ၣ်အမဲာ်ညါ ဖဲ ၂၀၂၄နံၣ်, လါဖ့ၤဘြူၤအါရံၤ(၁၁)သီအနံၤ, ဂီၤ(၆)နၣ်ရံၣ်အဆၢကတီၫ်စ့ၫ်ကီး က့ၤဟးထီၣ်ကွံာ်ကဒီးလၢ ကၠူၣ်လူၫ်သုးကလၢၤပူၤ ခဲလၢာ်၀ံၤ က့ၤပာ်ဖှိၣ်အသးဆူ မီၤဖူတၫ်တိာ်ကူၣ်ခိၣ်ကျၢၫ်သုးကလၢၤ(မော်ဖူးဗျူဟာစခန်း)လၢအိၣ်ဆီလီၤအသးဖဲ ၦဲၤလိာ်ကျိကၢၫ်ခိၣ်, ယဲၤမုၫ်ပျီကရူၫ်ပူၤန့ၣ်လီၤ. တကးဘၣ် မီၤဖူသုးကလၢၤ(မော်ဖူးဗျူဟာစခန်း)စ့ၫ်ကီး တၫ်လဲၤက၀ီၤခးအီၤတပယူၫ်ဃီဒီး တၫ်မၤအီၤတၫ်ကးတံာ်တဖၣ်အဂ့ၫ် ပာ်ဖျါဃာ်၀ဲန့ၣ်လီၤ.
သုးကီၣ်ကးအသုးကလၢၤလၢအမ့ၫ် လၢၫ်ကျ့ကၠိသုးကလၢၤအံၤ တၫ်ဟဲစးထီၣ်ဆီၤလီၤအီၤဖဲ (၁၉၉၇)နံၣ် ဒီး မ့မ့ၫ်ကၠူၣ်လူၫ်သုးကလၢၤတခီ တၫ်ဟဲဆီၤလီၤ၀ဲဖဲ (၂၀၀၇)နံၣ်အဂ့ၫ် တၫ်သ့ၣ်ညါဘၣ်န့ၣ်လီၤ. သုးကီၣ်ကးအသုးကလၢၤလၢ အသုးကွံာ်သး(၂)ဖျၢၣ်အံၤ ဘၣ်သုးကွံာ်အသးလၢ တၫ်ဆၢကတီၫ်ဖုၣ်ကိာ် တသီအဘၢၣ်စၢၤန့ၣ်လီၤအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
photo:knumutrawnews
