တၫ်ကထီၣ်ဒုးသဘှံးကွံာ် သုးကီၣ်ကးအသုးကလၢၤတဖၣ် ဃုာ်ဒီးတၫ်ကမၤ၀ဲသုးဂ့ၫ်၀ီတၫ်ရဲၣ်တၫ်ကျဲၤတဖၣ်အဂီၫ် သုးက့နီၫ်ဂံၫ်(၂), ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA) စးထီၣ်မၤ၀ဲ ခဲၤဖ့သီသံၣ်ခိၣ်တၫ်ရဲၣ်တၫ်ကျဲၤအဂ့ၫ် ဒီးလၢခဲၤဖ့တၫ်ရဲၣ်တၫ်ကျဲၤအပူၤ ကမျၢၫ်ထံဖိကီၫ်ဖိတဖၣ် ကပာ်ဖှိၣ်မၤသကိးတၫ်အဂီၫ် သုးက့နီၫ်ဂံၫ်(၂), သုးက့ခိၣ်, ကလံၤစိးဒုးယၤဟီၣ်က၀ီၤ(၂)မူဒါခိၣ် သုးခိၣ်ကျၢၫ်ဖိ စီၤအီကၢးစတံ တဲလီၤ၀ဲန့ၣ် ခဲၤဖ့သီသံၣ်ခိၣ် Facebook ကဘျံးပၤပူၤပာ်ဖျါဃာ်၀ဲဒီးတၫ်ဂီၤမူန့ၣ်လီၤ.
ခဲၤဖ့သီသံၣ်ခိၣ်တၫ်ရဲၣ်တၫ်ကျဲၤ တၫ်မုၫ်လၫ်တိာ်ပာ်တခီ မ့ၫ်၀ဲ စ့ယိၤကနုာ်လီၤ၀ဲအကကွဲၫ်(၁၀)န့ၣ်လီၤ. ခဲၤဖ့တၫ်ရဲၣ်တၫ်ကျဲၤအပူၤ တၫ်ဘျးစဲဃုာ်ဒီးသုးဂ့ၫ်၀ီတၫ်ရဲၣ်တၫ်ကျဲၤတဘျီဃီန့ၣ်လီၤ. မ့မ့ၫ်နီၫ်နီၫ်တခီ ဘၣ်ဃးဒီးသုးဂ့ၫ်၀ီတၫ်ရဲၣ်တၫ်ကျဲၤတဖၣ် တၫ်ရဲၣ်ကျဲၤပာ်လီၤဃာ်၀ဲ၀ံၤလံအဂ့ၫ် ကွဲးဖျါဃာ်၀ဲန့ၣ်လီၤ. ခဲၤဖ့တၫ်ရဲၣ်တၫ်ကျဲၤတၫ်တိာ်ပာ်မုၫ်လၫ်မ့ၫ်လၢၦဲၤန့ၣ် သုးမုၫ်သံၣ်ဘိတဖၣ် တၫ်ဘၣ်ဒိဘၣ်ထံးကစှၤအဂီၫ် ကျိချံၦာ်သၣ်ဒီး တၫ်သူ၀ဲဒရိ(ဒရုန်း)တဖၣ် ကန့ၫ်အါအါဂီၫ်ဂီၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ခဲၤဖ့မ့ၫ်တၫ်ဟဲနုာ်လီၤ စ့ယိၤအကလီၤ(၅၀)ဘးန့ၣ် တၫ်ကထီၣ်ဒုး၀ဲ ဒုၣ်ဒါသုးကလၢၤဖးဒိၣ်(ရန်သူ့စခန်းကြီး)(၁)ဖျၢၣ်, မ့ၫ်ဟဲနုာ်လီၤ စ့ယိၤအကကွဲၫ်(၁၀)ဘးန့ၣ် တၫ်ကထီၣ်ဒုး၀ဲ ဒုၣ်ဒါခီၣ်တဃာ်သုးကလၢၤ(ရန်သူ့အခြေစိုက်စခန်း)(၃)ဖျၢၣ်အဂ့ၫ် ဒီး မ့ၫ်ဟဲနုာ်လီၤ အကကွဲၫ်(၃၀)ဘးန့ၣ် တၫ်ကထီၣ်ဒုး၀ဲ ဒုၣ်ဒါအတၫ်ပၢဖီလာ်၀့ၫ် (၁)ဖျၢၣ်အဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ခဲၤဖ့သီသံၣ်ခိၣ်တၫ်ရဲၣ်တၫ်ကျဲၤအံၤ တၫ်ကစးထီၣ်မၤအီၤ ဖဲ ၂၀၂၄နံၣ်, လါဖ့ၤဘြူၤအါရံၤ(၂၀)သီအနံၤ ဒီး မ့မ့ၫ် တၫ်ပာ်ပနီၣ်တၫ်ဆၢကတီၫ်တခီ တၫ်ပာ်ပနီၣ်ဃာ်၀ဲလၢ (၃၀)သီအတီၫ်ပူၤအဂ့ၫ် ပာ်ဖျါဃာ်၀ဲန့ၣ်လီၤ.
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)အံၤ တၫ်ဒုးဆၢတ့ၫ်လံ သုးမီၤစိရိၤအံၤ အိၣ်ထီၣ်လံအနံၣ်(၇၅)ဘျဲၣ်လံအဂ့ၫ် သုးက့နီၫ်ဂံၫ်(၂)သုးက့ခိၣ် သုးခိၣ်ကျၢၫ်ဖိ စီၤအီကၢးစတံ တဲလီၤ၀ဲန့ၣ်လီၤ. သုးဟံးန့ၫ်ဆူၣ်ထံကီၫ်တၫ်စိတၫ်ကမီၤအဖီခိၣ် ကမျၢၫ်တဖၣ်မၤတၫ်ထီဒါလၢ တၫ်မုာ်တၫ်ခုၣ်အပူၤဘၣ်ဆၣ် သုးကီၣ်ကးတပၤ သူ၀ဲတၫ်စုဆူၣ်ခီၣ်တကးအဃိ ထံဖိကမျၢၫ်ဖိတဖၣ် ဟဲဃီၤဆူ ခ့ၣ်အဲၣ်ယူၣ်တၫ်ပၢဟီၣ်က၀ီၤပူၤ၀ံၤ မ့ၫ်တၫ်ပၢၫ်ဆၢအဂီၫ် ကဲထီၣ်တၫ်ဂံၫ်တၫ်ဘါဒီး တၫ်ဟ့ၣ်တ့ၫ်၀ဲ သုးတၫ်သ့တၫ်ဘၣ် ၦၤနီၫ်ဂံၫ်(၂)ကလးဘျဲၣ်လံအဂ့ၫ်စ့ၫ်ကီး တဲလီၤဃာ်၀ဲလၢ တၫ်ဂီၤမူအပူၤန့ၣ်လီၤ.
ကလံၤစိးသုးက့(၄)ဘ့ၣ် သုးဂ့ၫ်၀ီတၫ်ဟူးတၫ်ဂဲၤအဖီခိၣ် သုးကီၣ်ကးအသုးကလၢၤ လၢအိၣ်ဆီလီၤအသးဖဲ ဃိၣ်လိာ်ကျိကၢၫ်နံၤတဖၣ် တၫ်ဒုးဖျိကွံာ်အီၤ လၢာ်ဃၣ်ဃၣ်လံအဂ့ၫ်တဲလီၤ၀ဲန့ၣ်လီၤ.
လၢန့ၣ်အမဲာ်ညါ တၫ်ပၢၫ်ဆၢတၫ်မၤနၢၤကလဲၤသးချ့ချ့အဂီၫ် လၢခဲၤဖ့သီသံၣ်ခိၣ်တၫ်ရဲၣ်တၫ်ကျဲၤအပူၤ လိၣ်ဘၣ်သၦၫ်ကတၢၫ် ကမျၢၫ်ထံဖိကီၫ်ဖိတဖၣ် အတၫ်ပာ်ဖှိၣ်မၤသကိးဒီး တၫ်ဆီၣ်ထွဲမၤစၢၤအဂ့ၫ် တဲဆီၣ်တခူထီၣ်ဃာ်၀ဲန့ၣ်လီၤ.
