ကညီဖီၣ်စုက၀ဲၤတၫ်ကရၢကရိတဖၣ် ကပာ်ဖှိၣ်ထီၣ်သးဃူဃူဖိးဖိးဒီး မၤသကိးဃုာ်တၫ်အဂီၫ် KNU-ကညီဒီကလုာ်စၢဖှိၣ်ကရၢ ၦၤပၢၤလီၫ်ဆ့ၣ်နီၤ ပဒိၣ်စီၤကွဲၤထူ၀့ ကွဲမုာ်၀ဲန့ၣ်လီၤ.
ကရၢလၢ KNU ထုးကွံာ်အီၤမ့ၫ်ဂ့ၤ, ကရၢလၢထုးဖးအသးမ့ၫ်ဂ့ၤ, ကညီတၫ်ကရၢကရိလၢ အိၣ်လီၤပြံလီၤပြါတဖၣ် ကပာ်ဖှိၣ်ထီၣ်သး ဃူဃူဖိးဖိးအဂီၫ် အသးအိၣ်၀ဲအဂ့ၫ်န့ၣ် ဖဲလါဖ့ၤဘြူၤအါရံၣ်အသီ(၂၀)အနံၤ အတၫ်ကတိၤလီၤဆူ ကမျၢၫ်အိၣ်အကတီၫ် ဖၢနုာ်တဲဃုာ်၀ဲလီၤ.
လၢ KNU ကညီဒီကလုာ်စၢဖှိၣ်ကရၢ အတၫ်တီခိၣ်ရိၣ်မဲအဖီလာ် ၦၤမၤသကိးတၫ်တနီၤ ဖဲမၤတၫ်လၢၦၤကလုာ်ဂီၫ်အကတီၫ် တၫ်ထံၣ်တလီၤပလိာ်အိၣ်ဘၣ်ဆၣ် လၢတၫ်ဂ့ၫ်အကလုာ်ကလုာ်မ့ၫ်ဂ့ၤ, ကရၢလၢလီၤမုာ်လီၤဖးတဖၣ် ကညီတၫ်ကရၢကရိခဲလၢာ် တၫ်မုၫ်လၫ်, တၫ်ကွၫ်စိ, တၫ်တူၫ်ခီၣ်ပာ်သး, မ့ၫ်ဒၣ်တၫ်တမံၤဃီလီၤအဂ့ၫ် KNU ကညီဒီကလုာ်စၢဖှိၣ်ကရၢ ၦၤပၢၤလီၫ်ဆ့ၣ်နီၤ ပဒိၣ်စီၤကွဲၤထူ၀့တဲလီၤ၀ဲန့ၣ်လီၤ.
KNU တၫ်တီခိၣ်ရိၣ်မဲအဖီလာ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA), တကးဘၣ် ဒံၣ်မိၣ်ကရ့ၣ်စံၣ်ကညီတၫ်ဘၣ်ဘျူးသုးမုၫ်ဒိၣ်(BKBA), ကညီဒီကလုာ်တၫ်ထူၣ်ဖျဲးသုးမုၫ်ဒိၣ် တၫ်မုာ်တၫ်ခုၣ်ကီၣ်ကး(KNU/KNLA-PC), ကညီသုးခိးကီၫ်ဆၢ(BGF) ကရၢတဖၣ်ခဲလၢာ် အိၣ်လီၤမုၫ်လီၤဖးဘၣ်ဆၣ် ဒ်ကညီဒီကလုာ်အတၫ်မိၫ်န့ၫ်သးလီလၢအမ့ၫ် “ကီၫ်သူလ့ၤ” ကန့ၫ်အဂီၫ် ဖံးတၫ်မၤတၫ်လီၤအဂ့ၫ်စ့ၫ်ကီး ပဒိၣ်စီၤကွဲၤထူ၀့တဲလီၤ၀ဲန့ၣ်လီၤ.
ကညီကလုာ်အတၫ်မိၫ်န့ၫ်သးလီ ကလၢၦဲၤထီၣ်အဂီၫ် ကညီဖီၣ်စုက၀ဲၤတဖၣ်, ကညီကမျၢၫ်တၫ်ကရၢကရိတဖၣ် မ့ၫ်အိၣ်လၢ တၫ်ကရၢကရိတခါအဖီလာ်မးဒီး ကမၤနၢၤတၫ်လီၤအဂ့ၫ် ပဒိၣ်စီၤကွဲၤထူ၀့တဲ၀ဲန့ၣ်လီၤ.
ဖဲ KNU ကညီဒီကလုာ်စၢဖှိၣ်ကရၢ ဘၣ်တၫ်ကရၢကရိဒုးအိၣ်ထီၣ်အီၤ အမုၫ်နံၤၦဲၤထီၣ်(၇၇)နံၣ်န့ၣ် ဖဲလါဖ့ၤဘြူၤအါရံၣ်(၁၁)သီအနံၤန့ၣ် ကညီဒီကလုာ်အမုၫ်နံၤၦဲၤထီၣ်(၇၆)နံၣ်အသိး လၢကညီဒီကလုာ်အဂီၫ် မ့ၫ်မုၫ်နံၤမုၫ်သီလၢ အလီၤဆီတလါန့ၣ်လီၤအဂ့ၫ်တဲ၀ဲလီၤ.
ကညီဖီၣ်စုက၀ဲၤတဖၣ် လၢအမ့ၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA), ကညီတၫ်ဘၣ်ဘျူးသုးမုၫ်ဒိၣ်(DKBA), ကညီတၫ်ထူၣ်ဖျဲးသုးမုၫ်ဒိၣ် တၫ်မုာ်တၫ်ခုၣ်ကီၣ်ကး(KNU/KNLA-PC)ဒီး ကညီသုးခိးကီၫ်ဆၢ(BGF)တဖၣ် အဘၢၣ်စၢၤ ကအိၣ်ဃူအိၣ်ဖိးအဂီၫ် တၢၣ်ပီၣ်တဲသကိး၀ဲလၢ အနံၣ်(၁၀)ဘျဲၣ်အပူၤဘၣ်ဆၣ် အနီၫ်ကီၫ်တခီ ပာ်ဖှိၣ်ထီၣ်အသး တန့ၫ်ဒံးဘၣ်.
ဖဲအပူၤကွံာ် လါယနူၤအါရံၣ်(၃၁)သီအနံၤ တၫ်မၤလၤကပီၤ ကညီတၫ်ပၢၫဆၢ အမုၫ်နံၤၦဲၤထီၣ်(၇၅)နံၣ် အပူၤ ပဒိၣ်စီၤကွဲၤထူ၀့တဲ၀ဲလၢ ကညီဖီၣ်စုက၀ဲၤတဖၣ် ဒ်၁၉၄၉နံၣ် သးသဟီၣ်အသိး ကပာ်ဖှိၣ်ထီၣ်လိာ်က့ၤသးအဂီၫ် မ့ၫ်တၫ်လၢအရ့ဒိၣ်၀ဲအဂ့ၫ်တဲလီၤ၀ဲန့ၣ်လီၤ.
