သုးကီၣ်ကး အသုးကလၢၤတဖၣ်လၢ အိၣ်ဆီလီၤအသးဖဲ ကီၫ်ကရ့ၣ်နံၣ်(ကရင်နီပြည်), ၡါတီ၀့ၫ်(ရှားတောမြို့)အပူၤတဖၣ် တၫ်လဲၤထီၣ်ဒုးအီၤ ဘူးထီၣ်(၁)လါ၀ံၤအလီၫ်ခံ တၫ်မၤန့ၫ်၀ဲလံအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး(ကရင်နီအမျိုးသားကာကွယ်ရေးတပ်-KNDF) ထုးထီၣ်ပာ်ဖျါဃာ်၀ဲဖဲ လါဖ့ၤဘြူၤအါရံၤ (၁၅)သီအနံၤန့ၣ်လီၤ.
ၡါတီ၀့ၫ် တၫ်လီၫ်ခိၣ်သ့ၣ် သုးကီၣ်ကးခီၣ်ချ့သုးရ့ၣ်-၄၂၈ ဒီး ခိသုး သုးရ့ၣ်-၂၄၉ တဖၣ် တၫ်လဲၤစးထီၣ်ဒုးအီၤ ဖဲအပူၤကွံာ် လါယနူၤအါရံၤ(၁၅)သီအနံၤ, ယံာ်ဘူးထီၣ်(၁)လါ၀ံၤအလီၫ်ခံ ဖဲလါဖ့ၤဘြူၤအါရံၤ(၁၂)သီအနံၤန့ၣ် တၫ်ထီၣ်ဒုးမၤန့ၫ်၀ဲ ၡါတီ၀့ၫ်လံအဂ့ၫ် စံး၀ဲန့ၣ်လီၤ.
တၫ်ထီၣ်ဒုး ၡါတီ၀့ၫ်တၫ်ဒုးအပူၤ သုးကီၣ်ကးတပၤ သုးခိၣ်ဒိၣ်စိ(ဗိုလ်မှူးကြီး),သုးခိၣ်ဒိၣ်ဂီၫ်ဂ့ၫ်(ဒု-ဗိုလ်မှူးကြီး),သုးခိၣ်ဒိၣ်စိ(ဗိုလ်မှူး),ပၢၤကီၫ်ခိၣ်(ခံ)(ဒု-ရဲမှူး)ပာ်ဃုာ် ခဲလၢာ်ပာ်ဖှိၣ်(၁၆၀)ဂၤဘျဲၣ်သံ၀ဲ၀ံၤ တၫ်ဖီၣ်န့ၫ်စ့ၫ်ကီးမူဒံးန့ၣ်လီၤ. တကးဘၣ် တၫ်ဒုးအပူၤတၫ်မၤန့ၫ်စ့ၫ်ကီး ကျိဆံး(၁၂၈)ခိၣ်, ကျိဖးဒိၣ်အကလုာ်ကလုာ်(၁၈)ခိၣ်ဒီး ကျိချံၦာ်သၣ်သုးတၫ်ပီးတၫ်လီတဖၣ်အဂ့ၫ် စံး၀ဲန့ၣ်လီၤ.
ၡါတီ၀့ၫ်တၫ်ဒုးအပူၤ သုးကီၣ်ကးတပၤသူ၀ဲ ကဘီယူၤဒုးသုး(တိုက်လေယာဉ်), ကၠဲးဖဲၣ်တၣ်(ဂျက်ဖိုက်တာ), (Y12 Drop)တဖၣ်ဒီး တၫ်ဟဲခးလီၤစၢၤတၫ်လၢကလံၤကျါ(လေကြောင်းပစ်ကူ) (၂၀၅)ဘျီဘျဲၣ်၀ံၤ မ့မ့ၫ် KNDFတပၤ သံ၀ဲ(၃)ဂၤဒီး သုးအဂၤသုးဖိတဖၣ်စ့ၫ်ကီး တၫ်ဘၣ်ဒိဘၣ်ထံး,တၫ်သံတၫ်ၦၫ်အိၣ်၀ဲအဂ့ၫ် စံး၀ဲန့ၣ်လီၤ.
တၫ်ထီၣ်ဒုး၀့ၫ်တၫ်ဒုးအပူၤ သုးကီၣ်ကး ခးကျိဖးဒိၣ်တဖၣ်ဒီး ကလံၤကျါတၫ်ဒုးတဖၣ်အဃိ ကမျၢၫ်အိၣ်ဟံၣ်ဃီတဖၣ် ဟးဂီၤကွံာ်၀ဲ၀ံၤ လီၫ်က၀ီၤကမျၢၫ်လၢ ဘၣ်တၫ်မၤသံအီၤတဖၣ်စ့ၫ်ကီးအိၣ်၀ဲအဂ့ၫ် KNDF လီၫ်ခၢၣ်သးတၫ်ကစီၣ်ဒီးတၫ်ဘိးဘၣ်ရၤလီၤ(ဗဟိုသတင်းနဲ့ ပြန်ကြားရေး) ၦၤဘၣ်မူဘၣ်ဒါတဂၤ တဲ၀ဲန့ၣ်လီၤ.
“တၫ်ဒုးကဲထီၣ်တ့ၫ်၀ဲ ဘူးထီၣ်တလါအဃိ ၀့ၫ်ပူၤ တၫ်ဟးဂုၤဟးဂီၤတဖၣ်အိၣ်အါမးလီၤ. တၫ်ဒုးအပူၤ ကမျၢၫ်လၢဘၣ်တၫ်မၤသံအီၤစ့ၫ်ကီးအိၣ်၀ဲလီၤ. မ့မ့ၫ်တၫ်ဟးဂုၤဟးဂီၤ တၫ်အိၣ်သးတခီ တၫ်မၤနီၣ်ထၢဖှိၣ်ဃာ်၀ဲအဖၢမုၫ်ဒံးလီၤ“ အဂ့ၫ်စံး၀ဲန့ၣ်လီၤ.
တၫ်ထီၣ်ဒုးၡါတီ၀့ၫ်တၫ်ဒုးအပူၤ KNDF, ကရ့ၣ်နံၣ်သုးမုၫ်ဒိၣ်-KA (ကရင်နီတပ်မတော်-KA) ဒီး လွဲၫ်ကီၫ်-PDFသုးပာ်ဖှိၣ်(လွိုင်ကော်-PDF ပူးပေါင်းတပ်)တဖၣ် နုာ်လီၤဒုး၀ဲအဂ့ၫ် ပာ်ဖျါဃာ်၀ဲန့ၣ်လီၤ.
မ့မ့ၫ်လၢသုးကီၣ်ကးတပၤ ဘၣ်ထွဲဒီး ၡါတီ၀့ၫ်လီၤကွံာ်အဂ့ၫ်န့ၣ် တၫ်ထုးထီၣ်ပာ်ဖျါ၀ဲ တၫ်ကစီၣ်တအိၣ်နီၤတမံၤဒံးဘၣ်န့ၣ်လီၤ.
photo:KNDF
