၂၀၂၁နံၣ်,လါဖ့ၤဘြူၤအါရံၣ်(၁)သီနံၤ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤန့ၣ် မၤယံာ်ထီၣ်တၫ်သဘံၣ်သဘုၣ်လၢ ပှၤဖီၣ်စုက၀ဲၤကရၢတဖၣ်အဘၢၣ်စၢၤ၀ံၤ တၫ်ကထီဒါမၤနၢၤပှၤဟံးန့ၫ်ဆူၣ်တၫ်စိတၫ်ကမီၤတဖၣ်အဂီၫ် တၫ်ဒုးအိၣ်ထီၣ်သိၣ်မှံၤအသီတဖၣ်လၢဘၣ်ထွဲတၫ်တၢၣ်ပီၣ်တဲသကိးထံရူၫ်ကီၫ်သဲးအသီဒီး သိၣ်မှံၤကရၢအသီတဖၣ်ဟဲအိၣ်ထီၣ်၀ဲန့ၣ်လီၤ.

တၫ်အံၤအဃိတၫ်ပညိၣ်ခးလီၤကမျၢၫ်ထံဖိကီၫ်ဖိလၢကလံၤကျါပာ်ဃုာ် တၫ်ဒုးတပျုၫ်တပျီၫ်တၫ်အၢအၢသီသီတဖၣ် မၤ၀ဲလၢကညီကီၫ်စဲၣ်၀့ၫ်တဖၣ်အပူၤအဃိ (၂၀၂၁)နံၣ်လံၤလံၤ၀ံၤ ကမျၢၫ်ဟံၣ်ဃီတဖၣ်ဘၣ်လီၤမၫ်ကွံာ်၀ဲန့ၣ်လီၤ.

တၫ်တဂၢၫ်တကျၢၤ,တၫ်အိၣ်သးတလီၤတံၫ်လီၤဆဲးတဖၣ်အဃိ ပှၤတ၀ၢလၢတူၫ်ဘၣ်တၫ်သဘံၣ်သဘုၣ်တဖၣ် ဒ်သိးအ၀ဲသ့ၣ်အတၫ်အိၣ်သးကဂ့ၤထီၣ်အဂီၫ် တဒိးန့ၫ်ဘၣ်တၫ်ဆီၣ်ထွဲမၤစၢၤတဖၣ်၀ံၤ ဘၣ်ထဲးဂံၫ်ထဲးဘါလၢအနီၫ်ကစၫ်ဒၣ်၀ဲထီဘိန့ၣ်လီၤ.

လီၤဆီဒၣ်တၫ် လၢအ၀ဲသ့ၣ်ကအိၣ်မူကဒီးဆူညါအဂီၫ် တဒိးန့ၫ်ဘၣ်တၫ်ကစီၣ်ဒီးတၫ်ဂ့ၫ်တၫ်ကျိၤတဖၣ် လၢချုးဆၢချုးကတီၫ်ဘၣ်န့ၣ်လီၤ. ကညီကမျၢၫ်သ၀ီဖိတဖၣ်န့ၣ် အိၣ်ဆၢထၢၣ်ဂၢၫ်ကျၢၤ ၀ဲဒၣ်လၢတၫ်အိၣ်သးတဘျီညါအံၤအပူၤန့ၣ်လီၤ. ဘၣ်ဆၣ်သနာ်က့ ဖဲတၫ်ကီတၫ်ခဲအကတီၫ် အ၀ဲသ့ၣ်တဖၣ်န့ၣ်ဆဲးကျိး, ဒိးသန့ၤထီၣ်အသး လၢပှၤတ၀ၢတၫ်ကရၢကရိတဖၣ်ဒီး ဖဲလိၣ်ဘၣ်တၫ်မၤစၢၤအကတီၫ် ပာ်ဖှိၣ်၀ဲ၀ံၤတၫ်သ့ၣ်ညါတဖၣ် ဟ့ၣ်ခီဟ့ၣ်နီၤ၀ဲန့ၣ်လီၤ.

ဂဲၤလိာ်၀ဲလၢ ကဒိးန့ၫ်ဘၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤဘၣ်ဆၣ် တၫ်သဘံၣ်သဘုၣ်လၢအိၣ်တပယူာ်ဃီ ဒီးတကတၢၫ်ဒံးဘၣ်အံၤ ခီၣ်ဆၢ၀ဲကန့ၫ်အဂီၫ် ပှၤတ၀ၢတဖၣ်န့ၣ် လိၣ်ဘၣ်တၫ်ဟ့ၣ်တၫ်သ့ၣ်ညါနၫ်ပၢၫ် လၢအဂ့ၤတဖၣ်န့ၣ်လီၤ.

R2K ကညီကွဲၤလ့လိၤန့ၣ် မၤလၢပှဲၤန့ၫ်၀ဲ တၫ်လိၫ်ဘၣ်တဖၣ်န့ၣ်လီၤ. သူ၀ဲအိၣ်လဲ(Online)တၫ်ဘိးဘၣ်ရၤလီၤဒီး FMတၫ်ဘိးဘၣ်ရၤလီၤ(၂)ကလုာ်၀ံၤ လၢကညီစှီၤကျိာ်, လၢကညီပှိၫ်မုၫ်နုာ်ကျိာ်ဒီး ခီဖျိလၢတၫ်ဘိးဘၣ်ရၤလီၤလၢပယီၤကျိာ်တၫ်ရဲၣ်တၫ်ကျဲၤပူၤတဆီကတုၤဃီၤဆူပှၤတ၀ၢလၢကွၫ်ဆၢၣ်မဲာ်ဘၣ်တၫ်ကီတၫ်ခဲအိၣ်အဂီၫ် မ့ၫ်ကွဲၤလ့လိၤတၫ်မၤလီၫ်တခါလၢဘိးဘၣ်ရၤလီၤတၫ်န့ၣ်လီၤ.

R2K န့ၣ်ဘၣ်မၤထွဲ၀ဲလၢ KNUအတၫ်အၢၣ်လီၤတူၫ်လိာ်ဘၣ်ဆၣ်သနာ်က့တမ့ၫ် KNU အစုတီၤဖီလာ်ဘၣ်, မ့ၫ်ကွဲၤလ့လိၤသဘျ့လၢ ဟ့ၣ်ထီၣ်န့ၫ်တၫ်ဂ့ၫ်တၫ်ကျိၤလီၤတံၫ်လၢကညီကလုာ်တၫ်ဘၣ်ဘျူးဒီးတၫ်လိၫ်ဘၣ်တဖၣ် အဖီခိၣ်န့ၣ်လီၤ.

တၫ်တိာ်ကျဲၤအံၤ တၫ်စးထီၣ်မၤအီၤဖဲ ၂၀၂၂နံၣ် လါမးရှးအပူၤ၀ံၤ ပဒုးအိၣ်ထီၣ်န့ၫ် ကရၢတဖုလၢ အိၣ်ဒီးကံၫ်စီလၢ မၤ၀ဲကိးနံၤဒဲးကွဲၤလ့လိၤတၫ်ရဲၣ်တၫ်ကျဲၤဒီး အိၣ်လဲ(Online)ပူၤ ကွဲၤဟူဖျါတၫ်ရဲၣ်တၫ်ကျဲၤတဖၣ်သ့န့ၣ်လီၤ.

တၫ်ဂ့ၫ်တၫ်ကျိၤလၢဘိးဘၣ်ရၤလီၤ၀ဲတဖၣ်စ့ၫ်ကီးကိးနံၤဒဲးတၫ်ကစီၣ်တဖၣ်ဒီးဘၣ်ထွဲတၫ်ဂ့ၫ်တၫ်ကျိၤလၢကဲထီၣ်အသးတဖၣ်,ကမျၢၫ်လၢဘၣ်ကွၫ်ဆၢၣ်မဲာ် တၫ်တဘံၣ်တဘၢ, ဘၣ်ပာ်တ့ၫ်ကွံာ်တၫ်အိၣ်ဆိးလီၫ်ကျဲတဖၣ် အသးသဟီၣ်ကဆူၣ်ထီၣ်အဂီၫ် ပမၤစၢၤအီၤလၢ ဟ့ၣ်အီၤတၫ်သ့ၣ်ညါနၫ်ပၢၫ်တဖၣ်ပာ်ဃုာ်အသိး လၢတၫ်ကမၤမုာ်ကမျၢၫ်သးအဂီၫ် အိၣ်ဒီးတၫ်ရဲၣ်တၫ်ကျဲၤလၢ မၤသကိးဃုာ်တၫ်ဒီးကညီပှၤသူၣ်၀ံၣ်သးဆၢတၫ်ဖိတဖၣ် ပာ်ဃုာ်၀ဲန့ၣ်လီၤ.